قازاقستاندىق دارىگەرلەر تۇركيادان ەم تاپپاعان جىگىتتى اياققا تۇرعىزدى

  نۇر- سۇلتان. قازاقپارات - ەلوردادا نەيروحيرۋرگيا ۇلتتىق ورتالىعىنىڭ حيرۋرگتەرى بىرەگەي وتا جاساپ، پاتسيەنتتى مۇگەدەك بولىپ قالۋدان قۇتقاردى.

 قازاقستاندىق ازامات بۇعان دەيىن شەتەلدە ەم العانىمەن، ناتيجەسى بولماپتى، دەپ حابارلايدى ورتالىقتىڭ باسپا ءسوز قىزمەتى.

دارىگەرلەردىڭ سوزىنشە، ورتالىققا كەلگەن 18 جاستاعى جىگىت ومىرتقاسىنىڭ كەۋدە تۇسى قاتتى اۋىراتىنىن ايتىپتى. استانالىق جىگىت 2 جىل بويى اۋىر دەرتتەن زارداپ شەككەن. ول دارىگەرلەرگە جانىنا باتقان اۋرۋ اقىرىنداپ اياعىنا دا تاراپ كەلە جاتقانىن ايتىپتى. دەرتتىڭ اسقىنعانى سونشا، جاس جىگىت جاعدايى ناشارلاعاننان كەيىن ءجۇرىپ- تۇرا الماي قالعان.

 جاس جىگىت ەمدەلۋ ءۇشىن تۇركياعا اتتانعان. انتاليا قالاسىنداعى كلينيكانىڭ دارىگەرلەرى ونىڭ 12- ومىرتقاسىندا ۇلكەن ىسىك بارىن جانە ونىڭ جۇلىندى باسىپ تۇرعانىن انىقتاپتى. پاتسيەنت تۇركيالىق كلينيكادا وتا جاساتىپ، ەمدەلۋ ءۇشىن 70 مىڭ دوللار (26 ميلليون 600 مىڭ تەڭگەگە جۋىق) جۇمساعان. الايدا وسىعان قاراماستان، جۇرگىزىلگەن ەم ناتيجەسىز بولىپتى.

ارادا ءبىر جىل وتكەننەن كەيىن جاس جىگىت ەلورداداعى نەيروحيرۋرگيا ۇلتتىق ورتالىعىنىڭ ماماندارىنىڭ كومەگىنە جۇگىنەدى. دارىگەرلەر ومىرتقا مەتاللقۇرىلىمىنىڭ دارمەنسىزدىگىن، اعزانىڭ ونى قابىلداماعانىن جانە وتادان كەيىنگى جارانىڭ ىرىڭدەپ كەتكەنىن انىقتاعان. سونىمەن قاتار دارىگەرلەر انىقتاعانداي، بۇعان دەيىن جاسالعان وتا كەزىندە ىسىكتىڭ الىنباعان ەكەن. سونىڭ سالدارىنان ىسىك جۇلىندى قىسىپ قالىپتى.

 نەيروحيرۋرگ دارىگەرلەر جاس جىگىتتىڭ ومىرتقاسىنداعى مەتاللقۇرىلىمدى الىپ، ىسىكتى كەسىپ الىپ، ونىڭ جۇلىنعا اسەرىن جويعان. سونىمەن قاتار ۆەرتەبروپلاستيكا اتالاتىن ارنايى پروتسەدۋرانى جاساپ، 12-ومىرتقانى سۇيەك سەمەنتىمەن تولتىرىپتى.

دارىگەرلەر وتانىڭ ءساتتى وتكەنىن ايتتى. ولاردىڭ كومەگىنىڭ ارقاسىندا پاتسيەنت وزدىگىنەن ءجۇرىپ- تۇرا الاتىن بولعان.