تانىمال ايتىسكەرلەر قازاقستان قالالارىن ارالاپ، ايتىستى جاڭا فورماتتا وتكىزەدى
تۋر اياسىندا قازاقستاننىڭ 22 قالاسىندا بالعىنبەك يماش، اينۇر تۇرسىنبايەۆا، سارا توقتامىسوۆا، جانداربەك بۇلعاقوۆ سىندى تانىمال ايتىسكەرلەر ونەر كورسەتەدى. ءان مەن جىردان بولەك، كورەرمەندەرگە عالامات شوۋ كورسەتۋ دە جوسپارلانعان.
تالدىقورعاننان كەيىنگى ساپار سەمەي، پاۆلودار، اقتاۋ، قاراعاندى، جاڭاوزەن، پەتروپاۆل، ورال، تاراز قالالارىندا جالعاسىن تابادى.
«ءوز باسىم ايتىسقا ۇلكەن قۇرمەتپەن قارايمىن. ەڭ ۇزدىك ايتىسكەرلەردى جيناپ، ەل ارالاۋ كوپتەن بەرى ويىمدا ءجۇردى. سەبەبى، ايتىستى تارتىمدى ءارى زاماناۋي ەتىپ ۇسىنۋعا بولادى. ايتىستىڭ عۇمىرى ءالى ۇزاق. نەگىزگى وي وسى. مامىر ايىندا ءىرىلى-ۇساقتى بارلىق قالالاردى ارالايمىز. بيلەتتەردىڭ باعاسى ايتارلىقتاي ارزان جانە ءار وڭىردە بيلەت ءتۇسىمنىڭ ءبىر بولىگى قايىرىمدىلىققا بەرىلەدى. ياعني، بۇل - اقشا تابۋدى كوزدەيتىن جوبا ەمەس»، - دەدى جوبانىڭ باس پروديۋسەرى جان مۇقانوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
باسپا ءسوز ءماسليحاتىندا ايتىسكەر اقىن اينۇر تۇرسىنبايەۆا «اقىندىقتىڭ جەتى قىرى» تاقىرىبىن تارقاتىپ ءتۇسىندىرىپ بەردى.
«قايبىر جىلى حاباردا وتكەن «جۇلدىزدى ايتىستا» انشىلەر ءبىزدى مويىندادى. سەبەبى ايتىسكەر جان-جاقتى بولۋى كەرەك. ماسەلەن، ايتىسقا شىعىپ، دومبىرا تارتۋىڭىز - ءبىر ونەر. حالىققا كۇلىپ قاراپ وتىرۋىڭىز - اكتريسالىق قابىلەتىڭىز. ۇشىنشىدەن - قارسىلاسىڭىزدىڭ تىڭداپ وتىراسىز دا، تورتىنشىدەن - قارسىلاستىڭ سۇراعىنا، ءتيىسىپ وتىرعان شۋماعىنا لەزدە جاۋاپ ويلاپ تابۋ كەرەك. سۋىرىپ-سالىپ شىعارعان ولەڭدى دومبىراعا سالىپ، كۇلىپ وتىرىپ، ءبىر مەزەتتە حالىققا جەتكىزۋ - مەنىڭشە، اقىندارعا جەتى قىردىڭ ءوزى از شىعار. كرەاتيۆكە كەلسەك، بالعىنبەكتىڭ كەشىندە ەرەكشەلىكتەر وتە كوپ بولادى. جاستىڭ دا، كارىنىڭ دە قىزىعۋشىلىعىن تۋدىرۋ ءۇشىن بارىمىزدى سالىپ جاتىرمىز»، - دەدى ول.
سونداي-اق، ايتىسكەر وڭىرلەردەگى جاس اقىندارعا ۇندەۋ جاسادى.
«رەسپۋبليكالىق تۋر يدەياسى مەن وتكىزگەن شىعارماشىلىق كەشتەن باستاۋ الدى. مەنەن كەيىن بالعىنبەك تە 1- مامىردا ەسەپ بەرۋ كەشىن وتكىزەتىن بولدى. «ەكەۋىڭ قاشانعى ايتىساسىڭدار، شاكىرتتەرىڭ بار ما؟» دەگەندە، مەن سارانى، بالعىنبەك - جانداربەكتى اكەلدى. سولاي قيۋى كەلە قالدى. ەندى وڭىرلەردە تانىلماي جۇرگەن 20 قالاداعى اقىندارعا ۇندەۋ جاسادىق. بىزبەن ايتىسقا شىعىڭىزدار، باق سىناپ كورىنىڭىزدەر. ەش شەكتەۋ قويىلمايدى. جوبامىزدىڭ ەرەكشەلىگى دە وسى - تىم بولماسا 3-4 اقىندى ەلگە تانىتقىمىز كەلەدى»، - دەدى اينۇر تۇرسىنبايەۆا.