ديماش قۇدايبەرگەننىڭ كوپتەن كۇتكەن بەينەبايانى جارىققا شىقتى

نۇر- سۇلتان. قازاقپارات - ءانشى ديماش قۇدايبەرگەننىڭ جانكۇيەرلەرى كوپتەن كۇتكەن «قالجىراعان اققۋلاردىڭ سەزىمى» انىنە تۇسىرىلگەن بەينەبايان جارىق كوردى، دەپ حابارلايدى قازاقپارات ءتىلشىسى.

بەينەبايان «GUTSERIEV MEDIA» ارناسىنا جۇكتەلدى.

ايتا كەتسەك، «قالجىراعان اققۋلاردىڭ سەزىمى» ءانىنىڭ ءسوزىن رەسەيلىك اقىن - ميحايل گۋتسەريەۆ، مۋزىكاسىن يگور كرۋتوي جازدى.

 ەسكە سالا كەتسەك، ديماش قۇدايبەرگەن كەزەكتى كليپىن ءتۇسىرۋ ءۇشىن وسى جىلدىڭ اقپانىندا يسپانياعا اتتانعان بولاتىن. ارادا كوپ وتپەي، ءانشى اتالمىش ەلدەگى بەينەباياننىڭ تۇسىرىلىمىنەن فوتوسۋرەتتەرمەن بولىسكەن ەدى.

 «قادىرلى دوستار! «ليۋبوۆ ۋستاۆشيح لەبەدەي» ءانىنىڭ بەينەبايانى تۇسىرىلىمىنەن الىنعان بىرنەشە فوتوسۋرەتتى سىزدەرمەن بولىسكىم كەلدى. كليپتىڭ رەجيسسەرى - الان بادويەۆ. وزدەرىڭىز تۇسىنگەن شىعارسىزدار، ۆيدەو فەنتەزي ستيلىندە ءتۇسىرىلدى. سىزدەردى جاقسى كورەمىن!» - دەپ جازعان ەدى ديماش.

ديماش بىلتىر ماسكەۋدەگى كرەمل ساحناسىندا جانە «ن ت ۆ» ارناسىنىڭ «ورتالىق تەليەۆيدەنيە» باعدارلاماسىندا قوناقتا بولعاندا وسى ءاندى ورىنداعان بولاتىن.

اۆتور: ايان بەكەن ۇلى