تۇركىستاندىقتار جەرگىلىكتى كوكونىس ءونىمىن تۇتىنىپ وتىر

تۇركىستان. قازاقپارات - تۇركىستان تۇرعىندارى جەرگىلىكتى جىلىجايدىڭ كوكونىس ءونىمىن تۇتىنىپ وتىر، دەپ حابارلايدى قازاقپارات وبلىس اكىمىنىڭ باسپا ءسوز قىزمەتىنە سىلتەمە جاساپ.

تۇركىستان قالاسىندا ورنالاسقان «ەراسىل» جىلىجايىندا قىس مەزگىلىندە قىزاناق، قالعان ۋاقىتتا بولگار بۇرىشى وسىرىلەدى. وندىرىلگەن ءونىم «ياسسى» كوكونىس بازارىنا كوتەرمە باعادا ساۋدالانادى. جىلىجايدىڭ جىلدىق ءونىم الۋ قۋاتتىلىعى شامامەن 45 توننا بولگار بۇرىشى، 35-40 توننا قىزاناق. ءوز كاسىبىن كەڭەيتكەن جەكە كاسىپكەر ەرعالي جولداسبەكوۆ تۇركىستاندىق تۇرعىنداردى تازا تابيعي ونىممەن قامتىپ وتىر.

 جىلىجاي جالپى اۋماعى 1,2 گەكتار جەر تەلىمىندە ورنالاسقان. ال، جۇمىسشىلاردىڭ جالاقى مولشەرى - 60-70 مىڭ تەڭگە كولەمىندە.

 وتباسىلىق كاسىپتى عاني جانە ءمادي ەسىمدى ۇلدارى جانداندىرۋدا. ىسكەر اكەنىڭ تىنىمسىز ەڭبەگىن ۇلگى تۇتاتىن پەرزەنتتەرى شارۋاشىلىقتاعى كۇتىپ- باپتاۋ جۇمىستارىنا دەيىن وزدەرى جاساۋعا ماشىقتانعان. جىلىجايدا تامشىلاتىپ سۋارۋ ءادىسىن قولدانۋ جولعا قويىلعان. بۇگىندە مۇندا 30 مىڭ ءتۇپ بولگار بۇرىشى ەگىلۋلى. اقپان ايىنىڭ ورتاسىندا ەگىلگەن العاشقى كوشەتتەردى كۇنى ەرتەڭ جيىپ- تەرۋ جۇمىستارى باستالماق.