ەندى قازاقستاندىقتار ءۇشىن قۇجات راسىمدەۋ جەڭىلدەيدى
زاڭ جوباسى مەملەكەتتىك قىزمەتتەر كورسەتۋ ماسەلەسىندە «ءبىر تەرەزە» قاعيداتىنان «ءبىر ءوتىنىش» قاعيداتىنا كوشۋ، مەملەكەتتىك قىزمەتتەردى تولىعىمەن ەلەكتروندى فورماتقا كوشىرۋدى كوزدەيدى.
بۇل تۋرالى Sputniknews.kz حابارلايدى.
بيىل ەلەكتروندى فورماتقا 80 پروتسەنتى اۋىسسا، كەلەسى جىلى تاعى 10 پروتسەنتى كوشىرىلمەك. قۇجاتتىڭ باستى جاڭالىعى - «پروپيسكانى» الىپ تاستاۋ.
ءماجىلىس دەپۋتاتى مايرا ايسينانىڭ ايتۋىنشا، قازىر ادامدار تىركەلگەن جەرىنە بايلانعاننان كەيبىر قىزمەتتەردى وزىنە ىڭعايلى ەتىپ المايدى.
«وسىعان بايلانىستى، ازاماتتىق حال اكتىلەرىن تىركەۋدىڭ بارلىق جەتى ءتۇرى بويىنشا قىزمەت كورسەتۋدىڭ ەكساۋماقتىق قاعيداتىن ەنگىزۋ تۇرعىسىندا تۇزەتۋلەر ەنگىزىلىپ وتىر. بۇل قاعيداتتى ەنگىزۋ ارقىلى ازاماتتىڭ ءوتىنىشتى تۇرعىلىقتى جەرى بويىنشا بەرۋى مىندەتتى ەمەس. ءوز قالاۋى بويىنشا قازاقستان اۋماعىنداعى كەز كەلگەن تىركەۋشى ورگانعا بەرە الادى»، - دەدى دەپۋتات ءماجىلىستىڭ جالپى وتىرىسىندا.
بۇل بالا تۋۋ، نەكە قيۋ نەمەسە ونى بۇزۋدى، ادامنىڭ قايتىس بولۋى، اتىن، اكەسىنىڭ اتىن جانە تەگىن وزگەرتۋدى، اسىراپ الۋدى، اكە بولۋدى انىقتاۋدى تىركەۋگە بايلانىستى.
بۇعان قوسا، سىبايلاس جەمقورلىققا جول بەرمەۋ جانە بيزنەسكە قولايلى جاعداي جاساۋ ءۇشىن ورتا جانە ءىرى كاسىپكەرلىك سۋبەكتىلەرىن تىركەۋدى تولىعىمەن ەلەكتروندى فورماتقا كوشىرۋ ءارى قۇجاتتار تىزبەسىن وڭتايلاندىرۋ كوزدەلىپ وتىر. ەندى ەلەكتروندى وتىنىشتەن كەيىن جەكە كاسىپكەرلىكتى تىركەۋ قازىرگىدەي ءبىر كۇن ەمەس، ءبىر ساعاتتا ىسكە اسىرىلادى.
سونداي-اق، ايسينا زاڭ جوباسىندا اكە بولۋدى بەلگىلەۋ مەن اسىراپ الۋدى مەملەكەتتىك تىركەۋدى الىپ تاستاۋ كوزدەلگەنىن اتاپ ءوتتى. ويتكەنى اكە بولۋدى بەلگىلەۋ جانە اسىراپ الۋ تۋرالى شەشىم شىعارعان سوت وسى شەشىمدى تىركەۋشى ورگانعا ەلەكتروندىق تۇردە جىبەرەدى.
«بۇل قاعاز قۇجات اينالىمىن ەداۋىر قىسقارتىپ، بلانكىگە جۇمسالاتىن شىعىنداردى ازايتادى. بۇعان قوسا، اسىراپ الۋ قۇپياسى ساقتالادى، سەبەبى اسىراپ الۋ/اكە بولۋدى انىقتاۋ تۋرالى كۋالىك قولعا بەرىلمەيدى»، - دەدى دەپۋتات.
ءماجىلىس دەپۋتاتتارى بۇل زاڭ جوباسىن ءبىرىنشى وقىلىمدا ماقۇلدادى.