ەۋروپارلامەنت شەنگەن ۆيزاسىن بەرۋدىڭ جاڭا ەرەجەلەرىن بەكىتتى
«ەۋرووداق قىسقا مەرزىمدى ۆيزالارعا ءوتىنىم جولداۋ جانە ولاردى بەرۋ پروتسەدۋرالارىن جەڭىلدەتەدى، سونداي- اق ە و- عا كىرمەيتىن ەلدەرمەن ميگراتسيا سالاسىنداعى ىنتىماقتاستىققا تۇرتكى بولۋى ءۇشىن ءوزىنىڭ ۆيزا ساياساتىن پايدالاناتىن بولادى» ، - دەلىنگەن ەۋروپارلامەنت حابارلاماسىندا.
اتاپ ايتقاندا، وزگەرىستەر 90 كۇنگە دەيىنگى قىسقا مەرزىمدى ساپارلارعا قاتىستى. بۇل رەتتە، ادال نيەتتى ساياحاتشىلار ءۇشىن پروتسەدۋرالار جەڭىلدەيدى.
جاڭا ەرەجەگە سايكەس، ۆيزا الۋعا ءوتىنىش ساپار جوسپارلانعان كۇنگە دەيىن التى اي ىشىندە (قازىرگى ءۇش ايدىڭ ورنىنا) جانە كەم دەگەندە 15 كۇن بۇرىن بەرىلۋى ءتيىس. ال تەڭىزشىلەر توعىز اي بۇرىن دا تاپسىرا الادى.
بۇدان بولەك، ۆيزانىڭ قۇنى 60 ەۋرودان 80 ەۋروعا قىمباتتادى. دەگەنمەن، 18 جاسقا دەيىنگى جاسوسپىرىمدەر مەن 6 جاسقا دەيىنگى بالالارعا جەڭىلدىكتەر قاراستىرىلعان. عالىمدار مەن ستۋدەنتتەر بۇرىنعىشا ۆيزالىق الىمنان بوساتىلعان.
ۆيزا الىمىنىڭ مولشەرى، وتىنىشتەر بويىنشا شەشىم قابىلداۋ ۋاقىتى، ۆيزانىڭ بىرنەشە رەت كىرۋگە جارامدى بولاتىن ۋاقىتى سياقتى كەيبىر ەرەجەلەر ە و مەن ارىپتەس مەملەكەت اراسىنداعى ىنتىماقتاستىقتىڭ دەڭگەيىنە قاراي اركەلكى بولۋى مۇمكىن.
جاڭا ەرەجەنى ە و كەڭەسى بەكىتۋى ءتيىس. ودان ءارى ە و- نىڭ رەسمي جۋرنالىندا جاريالانعاننان كەيىنگى التى ايدان سوڭ كۇشىنە ەنەدى.
قازىرگى كەزدە شەنگەن ايماعىنا كىرۋ ءۇشىن 100 دەن استام ەلدىڭ ازاماتتارىنا ۆيزا رەسىمدەۋ قاجەت. سوڭعى بىرنەشە جىلدا ۆيزا الۋعا تاپسىرىلعان وتىنىشتەردىڭ كولەمى %50 ارتقان. اتاپ ايتقاندا، 2009 -جىلى 10,2 ميلليون ءوتىنىش بەرىلسە، 2016 -جىلى ولاردىڭ سانى 15,2 ميلليونعا جەتكەن.
ايتا كەتەيىك، ەۋروكوميسسيانىڭ دەرەكتەرى بويىنشا، ەۋروپا ەلدەرىنىڭ ەكونوميكاسىندا تۋريزم يندۋسترياسى ماڭىزدى ءرول اتقارادى. ەو جالپى ىشكى ونىمىندەگى ءتۋريزمنىڭ ۇلەسى شامامەن % 10.
اۆتور: تيمۋر دۇيسەكەيەۆ