بۇگىنگى ءىستى ەرتەڭگە قالدىرماۋدىڭ ۇتىمدى تاسىلدەرى

 نۇر-سۇلتان. قازاقپارات - «ەرتەڭىڭىز» بىتپەيتىن ەرىنشەككە اينالىپ بارا جاتقانىڭىزدى بايقادىڭىز با؟ ودان ارىلۋدىڭ تاماشا ءتاسىلى بار.

جىل سايىن «ورىنداۋىم كەرەك» دەپ جەكە جوسپارىڭىزعا ەنگىزىپ جاتقانىڭىز ازايىپ جاتىر ما، الدە كوبەيۋدە مە؟ ەگەر، كوبەيىپ جاتسا، وندا ۋاقىتىندا ورىندالماعانى دەپ ءبىلىڭىز. بۇل شارۋالاردى، ماسەلەلەردى، ارمانداردى ءبىر سوزبەن جۇمىس دەپ قاراستىرعان دۇرىس شىعار. ال، قوردالانىپ جينالعان قات-قابات بۇل جۇمىستاردى قالاي ورىنداپ تاۋىسۋعا بولادى؟ قايسىسىنان باستاعان ءجون؟ تايم-مەنەدجمەنت ماماندارى بۇل ورايدا ەڭ الدىمەن «ورىنداۋىم كەرەك» دەپ جۇرگەن جۇمىستارىڭىزدى سارالاپ الۋعا كەڭەس بەرەدى. جانە جۇمىستى سارالاۋعا ارنالعان كوپ ءادىس-ءتاسىلدى ۇسىنادى. قايسىسى ءتيىمدى؟

تايم- مەنەدجمەنت تاسىلدەرىنىڭ تانىمالدىلىعى جاعىنان الدىڭعى ورىندا تۇرعانى - «ەيزەنحاۋەر ماتريتساسى» بولسا، ال ەڭ كوپ قولدانىلاتىنى - «اۆسد» ءادىسى ەكەن. «ەيزەنحاۋەر ماتريتساسى» نەلىكتەن تانىمال؟ ويتكەنى، ونىڭ اۆتورى - 34- ا ق ش پرەزيدەنتى، امەريكاندىق اسكەري قايراتكەر دۋايت دەۆيد ەيزەنحاۋەر. بۇل ءتاسىلدى كوبىنە باسقارۋ قىزمەتىندە وتىرعان باسشىلار، بيزنەسمەندەر، ءىرى كومپانيا يەلەرى قولدانادى. سوندىقتان دا، ول ەل اراسىندا كەڭىنەن تاراعان. ال، ۇعىنىقتىلىعى مەن قاراپايىمدىلىعى جاعىنان قاراستىرساق، وندا ەڭ ءبىرىنشى «اۆسد» ەرەجەسى اتالادى. بۇنى قاراپايىم حالىق ءجيى پايدالانادى.

باسشىلار، بيزنەسمەندەر كوپ پە، الدە حالىق پا؟ ارينە، حالىق! ەندەشە، «اۆسد» ءادىسىنىڭ نەگە كوپ قولدانىلاتىنى دا تۇسىنىكتى بولار. سونىمەن، كوپ جۇمىستىڭ قايسىسىنان باستاپ ورىنداۋدى انىقتاۋ ءۇشىن تايم-مەنەدجمەنتتىڭ تانىمال ءادىسى مەن ءجيى قولدانىلاتىن ءتاسىلىن بىرگە پايدالانۋ كەرەك.

«ەيزەنحاۋەر ماتريتساسى» + «اۆسد» ءتاسىلى قولىڭىزعا قالام الىپ، وسى ۋاقىتقا دەيىن ورىندالماعان جانە ورىندالۋى ءتيىس دەپ جۇرگەن جۇمىس، ماسەلە، ءىس، تىرلىكتەرىڭىزدى قاعازعا جازىپ شىعىڭىز. اسىقپاڭىز. سودان سوڭ بۇل ءتىزىمدى ماڭىزدىلىعى مەن ورىندالۋدى قاجەت ەتەتىن جەدەلدىلىگىنە قاراي 4-كە ءبولىپ توپتاڭىز.

ا) ماڭىزدى ءارى جىلدام ورىنداۋدى قاجەت ەتەتىن جۇمىستار

ۆ) ماڭىزدى ەمەس، ءبىراق جىلدام ورىنداۋدى قاجەت ەتەتىن جۇمىستار

س) ماڭىزدى، ءبىراق كەيىن ورىنداۋعا بولاتىن جۇمىستار

د) ماڭىزدى ەمەس جانە جىلدام ورىنداۋدى قاجەت ەتپەيتىن جۇمىستار بايقاساڭىز، سان جاعىنان ەڭ از جۇمىس ءتىزىمى - «ا» توبىندا. ودان كەيىنگى ورىندا - «ۆ» توبىنداعى جۇمىستار، سودان سوڭ «س» توبى تۇرسا، ەڭ كوپ جۇمىس - «د» توبىندا. بۇل كورسەتكىش اركىمدە ءارقالاي بولۋى مۇمكىن، دەگەنمەن «ەيزەنحاۋەر ماتريساسىنىڭ» انىقتاۋىنشا، كوپشىلىگىمىزدىڭ «باس قاتىرىپ» جۇرگەن ماسەلەلەرىمىز - «ماڭىزدى ەمەس ءارى اسا قاجەت ەمەس» ەكەن. ازىق- تۇلىكتىڭ عانا ەمەس، كەيبىر شارۋانىڭ دا «مەرزىمى وتەدى» شاقشاداي باسىڭىزعا سىيماي قاتتالىپ تۇرعان جۇمىس سانىن ازايتۋ ءۇشىن، «بۇل ەندى ماڭىزدى ما؟» دەگەن سۇراقپەن ءار توپتاعى ءتىزىمدى سارالاپ، سۇزگىدەن وتكىزىڭىز.

1-مىسال: كوپ جىلدان بەرى جوسپارىڭىزدان تۇسپەي كەلە جاتقان «ەكىنشى ماماندىقتى وقىپ الۋ»، «ماگيستراتۋراعا ءتۇسۋ» سەكىلدى ماسەلەلەر ءالى دە ءسىز ءۇشىن ماڭىزدى ما؟ مۇمكىن ەندى قاجەتى جوق شىعار؟! بۇگىندە كوپ جۇمىس ورنى ديپلومعا ەمەس، ادامنىڭ ءبىلىمى مەن ەڭبەكقورلىعىنا قاراي قابىلدايدى. سونىمەن قاتار، نەسىبەڭىزدى ساۋدا سالاسىنان تاۋىپ جۇرگەن بولساڭىز، «ماگيسترانت» اتانۋدىڭنە كەرەگى بار؟

2-مىسال: اعايىن- تۋىستىڭ باسىن قوسىپ ۇل توي جاساۋ. بۇل جوسپاردى كەز كەلگەن اكە ۇلدى بولعان كەزدە ويلاسا كەرەك. ءبىراق تا، قازىر ۇلىڭىز قانشا جاستا؟ «ۇل توي» دەپ اتاپ جۇرگەنىمىزبەن، ول سالت-داستۇرىمىزدە «سۇندەت توي» دەپ اتالادى. ال، 12-14 جاسقا كەلگەن ۇلعا سۇندەت توي جاساۋ ەرسى ەمەس پە؟ تاعى دا 4-5 جىل كۇتسەڭىز، ۇلىڭىزدىڭ ۇيلەنۋ تويىن جاسايسىز. مىنە، ورىندالۋى ءتيىس دەپ جۇرگەن جوسپارداعى مۇنداي جۇمىستار «مەرزىمى وتكەن» دەپ اتالادى.

«مەرزىمى وتكەن» شارۋالار الدەقاشان ماڭىزدىلىعىن جويعان. ولاي بولسا، ەندى ونى جىل سايىن جوسپار- داپتەرىنە جازا بەرۋدىڭ دە قاجەتى جوق. ءوشىرىڭىز جانە ۇمىتىڭىز. ا، ۆ، س، د توپتارىنداعى ءتىزىم كەمىدى. ساراپتامادان سوڭ ەندى ءسىز قاي ءىستى ءبىرىنشى ورىنداۋ كەرەكتىگىن، قاي جۇمىس كۇن سايىن بەلگىلى ءبىر كۇش پەن ۋاقىتتى قاجەت ەتەتىندىگىن بىلەسىز دەپ ويلايمىن. ءيا، «ا» توبىنداعىلار - وزەكتى، كەيىنگە قالدىرۋعا بولمايدى. ىسكە اسىرۋ ءۇشىن مۇمكىندىكتى كۇتپەڭىز، ءدال قازىر ىزدەپ تابىڭىز. سىزگە قيىن بوپ كورىنگەن بۇل ماسەلە ء»بىر قوڭىراۋ شالۋمەن» شەشىلەتىن شىعار؟! انىعىراق ايتقاندا، بۇل توپتاعى ىستەردى بارىنشا جىلدام ورىنداعان ءجون. ماڭىزدى ءارى جىلدام ورىنداۋدى قاجەت ەتكەندىكتەن ءبىرىنشى «ا» توبى جۇمىستارى اتقارىلدى.

سوسىن «س»، الدە «ۆ» توبى؟ ياعني، ماڭىزدىلىعى، الدە جەدەلدىگى ەسكەرىلەدى؟ ارينە، ماڭىزدى بولماسا دا «ۆ» توبىنداعى جۇمىستار ءتىزىمىن ەڭسەرىڭىز. ويتكەنى، بۇلار - تۋىنداۋى مۇمكىن ماسەلەلەردىڭ الدىن الاتىن شارۋالار. ال «س» توبىنداعى جۇمىستار ماڭىزدى بولسا دا، ولارعا جۇمىستان كەيىنگى كەشكى ۋاقىتتى ارناۋعا بولادى (اۋرۋحانادا جاتقان قۇربىڭىزعا بارۋ، پەرزەنتتى بولعان جەڭگەڭىزدى قۇتتىقتاۋ ت. ب. ). د توبىنداعى ۇساق- تۇيەك جۇمىستارعا تۇنگى ۋاقىت ىڭعايلى (تەلەفونداعى ۇزاق اڭگىمە ت. ب. ). جالپىعا بىردەي تۇسىنىكتى بولۋ ءۇشىن، مەيلىنشە قاراپايىم مىسالدار كەلتىردىم.

وسىلاي «ەيزەنحاۋەر ماتريتساسى» مەن «اۆسد» ەرەجەسىن ءبىر جىلدىق ءومىر جوسپارىنا، ءبىر ايعا ارنالعان جەتىستىك جوسپارىنا قولدانىپ، ناقتى ناتيجەگە جەتە الاسىز. ال، بۇل تاسىلدەردى كۇندەلىكتى اتقارىلۋى ءتيىس جۇمىستار قولدانۋعا بولا ما؟ ارينە! وندا ەشقاشان ءسىزدىڭ بۇگىنگى ءىسىڭىز ەرتەڭگە قالمايدى.

ERNUR. KZ