تۇركىستاندا ەڭ سۇلۋ قىز تاڭدالدى
«تۇركىستان ارۋى - 2019» اتاعى مەن گران- پريدى كەنتاۋلىق 18 جاستاعى اقنيەت ءسادۋاقاسوۆا جەڭىپ الدى، - دەپ حابارلايدى Tengrinews.kz ءتىلشىسى.
ءبىرىنشى ورىندى جىبەك مامەش (تۇركىستان) ەنشىلەدى، ال ەكىنشى ورىن نۇرشاش شاكىربايەۆاعا (تۇركىستان)، ءۇشىنشى ورىن جانسايا قۇربانعا (ماقتاارال) بۇيىردى.
كاستينگكە وبلىستىڭ تۇكپىر- تۇكپىرىنەن 90-عا جۋىق قىز كەلگەن، ونىڭ 15 ى فينالعا جولداما الدى. بايقاۋ ءتورت كەزەڭنەن تۇردى. قاتىسۋشىلار ءوز تالانتتارىن كورسەتتى: ءان ايتتى، بيلەدى، اكتەرلىك شەبەرلىكتەرىن پاش ەتتى.
سونداي-اق، قازاقستان تاريحى بويىنشا سۇراقتارعا جاۋاپ بەرىپ، قازاق حالقىنىڭ سالت- داستۇرلەرى تۋرالى ايتتى. ال سوڭعى كەزەڭدە قىزدار كەشكى كويلەكپەن ءجۇرىپ ءوتتى.
جەڭىمپازعا 300 مىڭ تەڭگە بەرىلدى. ەندى ول حالىقارالىق سۇلۋلىق بايقاۋلارىندا تۇركىستان وبلىسىنىڭ نامىسىن قورعايدى. ۇزدىك ءتورت قاتىسۋشى قارجىلاي سىيلىقتار الدى، ال قالعان قىزدارعا ءىس-شارا سەرىكتەستەرىنەن سىيلىقتار تابىستالدى. ءادىل قازى قۇرامىندا وبلىستىق ءماسليحات پەن وبلىستىق قۇرىلىم وكىلدەرى، مودەل اگەنتتىگىنىڭ ديرەكتورى، پروديۋسەرلىك ورتالىقتىڭ وكىلى، سونىمەن قاتار، «قازاقستان ارۋى - 2016» ۇلتتىق بايقاۋىنا قاتىسقان تۇركىستاننىڭ العاشقى وكىلى، «عالامشار ارۋى - 2016» قاتىسۋشىسى زارينا زاعيدۋللينا بولدى. گران-پري يەگەرى اقنيەت ءسادۋاقاسوۆا ياسساۋي اتىنداعى حالىقارالىق قازاق-تۇرىك ۋنيۆەرسيتەتىندە وقيدى.
Kaz.tengrinews.kz