اتاقتى «دوس-مۇقاساننىڭ» ءانشىسى «ەير استانا» قىزمەتشىسىن ۇرعان
بۇل تۋرالى «ەير استانا» كورپوراتيۆتى كوممۋنيكاتسيالار دەپارتامەنتىنىڭ مەنەدجەرى تىلەك ابراحمانوۆ ايتتى، دەپ حابارلايدى قازاقپارات ءتىلشىسى.
«14 -ساۋىردە «نۇر-سۇلتان- الماتى» باعىتىنداعى ك س852 رەيسىنەن ءتارتىپ بۇزعان جولاۋشى شىعارىلدى. رەيسكە وتىرعىزۋ كەزىندە م. قۇسايىنوۆ داۋىس كوتەرە سويلەپ، بالاعات سوزدەر ايتتى. ۇشۋ قاۋىپسىزدىگىنە قاتەر توندىرۋىنە بايلانىستى ەكيپاج ونى تاسىمالداۋعا قابىلداماعاندىقتان، اۋە كومپانيانىڭ قىزمەتكەرلەرى كوزىنشە م. قۇسايىنوۆ قىزمەت كورسەتەتىن مەنەدجەردىڭ ماڭدايىنان قاتتى ۇرىپ جىبەرگەن. ونىڭ دەنساۋلىعىنا زاقىم كەلگەن»، - دەدى تىلەك ابراحمانوۆ.
وسى ورايدا، «ەير استانا» جولاۋشىلاردىڭ اۋە كومپانيانىڭ قىزمەتكەرلەرىنە قاتىستى قۇقىققا قايشى ارەكەتتەرىنە توزبەيتىنىن، سونداي-اق جابىرلەنگەن قىزمەتكەرىنە جان-جاقتى قولداۋ كورسەتەتىنىن مالىمدەدى.
«اۋە كومپانيا نۇر-سۇلتان قالاسى اۋەجايىنداعى پوليتسيانىڭ جەلىلىك بولىمشەسىنە سوتقا دەيىنگى تەرگەۋ جۇرگىزۋ جانە م. قۇسايىنوۆتى جاۋاپكەرشىلىككە تارتۋ تۋرالى ءتيىستى ارىزدى جولدادى»، - دەدى ت. ابراحمانوۆ.