ىقىلاس، نيەتىڭىز ءۇشىن راحمەت - ديماش ق ر پرەزيدەنتىنە العىس ايتتى

الماتى. قازاقپارات - تانىمال قازاقستاندىق ءانشى ديماش قۇدايبەرگەن قازاقستان پرەزيدەنتى قاسىم-جومارت توقايەۆقا قولداۋ كورسەتكەنى ءۇشىن العىس ءبىلدىردى، دەپ حابارلايدى قازاقپارات ءتىلشىسى.

ديماش Instagram پاراقشاسىندا مىناداي جازبا قالدىردى: «ىقىلاس، نيەتىڭىز ءۇشىن، اسا زور قۇرمەتىڭىز ءۇشىن كوپ راحمەت، قاسىم-جومارت كەمەل ۇلى!».

ول جازبانىڭ استىنا ق ر پرەزيدەنتى قاسىم-جومارت توقايەۆتىڭ Instagram-داعى سوزدەرىن كەلتىردى.

«ديماش قۇدايبەرگەن - ءان ونەرىندەگى قۇبىلىس. ناعىز تالانت يەسى. قازاقتىڭ مادەنيەتىن، ءان ونەرىن شارتاراپقا پاش ەتىپ جۇرگەن ۆيرتۋوز. كەشە قازاقتىڭ ماقتانىشىنا وزبەكستان جۇرتشىلىعى دا ءتانتى بولىپ، ونەرىنە قول سوقتى. ديماشتىڭ ءالى تالاي بيىكتەردى باعىندىرارىنا سەنىمدىمىن جانە تىلەكتەسپىن»، - دەپ جازدى پرەزيدەنت ينستاگرام پاراقشاسىندا.