رەسەيدە ستاليندى قولدايتىندار سانى ارتتى
2019 -جىلى ناۋرىزدا ورتالىق جۇرگىزگەن ساۋالناماعا قاتىسقان ءاربىر ەكىنشى ادام (51 پايىز) ستالينگە سۇيسىنەتىنىن نە قۇرمەتپەن قارايتىنىن ايتقان. «اتىن ەستىگەندە تىتىركەنەمىن»، «قورقامىن» نە «جيەركەنەمىن» دەپ ستالينگە نەگاتيۆتى قارايتىندار سانى ءۇش ەسە از - 14 پايىز.
ساۋالناماعا قاتىسقانداردىڭ 19 پايىزى ستاليننىڭ رەسەي تاريحىنداعى رولىنە تەرىس باعا بەرگەن.
ستالين مەن ونىڭ تاريحتاعى رولىنە وڭ باعا بەرەتىندەر اراسىندا رەسەي كوممۋنيستىك پارتياسىن جاقتايتىندار عانا ەمەس، پرەزيدەنت سايلاۋىندا ۆلاديمير پۋتين مەن ۆلاديمير جيرينوۆسكييگە داۋىس بەرگەندەر دە بار. الەۋمەت تانۋشىلار سوزىنشە، بارلىق جاس ساناتى بويىنشا ستالينگە وڭ باعا بەرەتىندەر باسىم تۇسكەن.
ساۋالناما قورىتىندىسى بويىنشا، «ستالين تۇسىندا ازاماتتاردىڭ رەپرەسسياعا ۇشىراۋىن اقتاۋعا بولمايدى» دەگەن ويدى رەسەيلىكتەردىڭ 45 پايىزى قولدايدى. 2008 -جىلى بۇل كورسەتكىش 60 پايىز ەدى.
2017 -جىلى «ليەۆادا- سەنتر» سوڭعى 27 جىلدا ستالينگە وڭ قارايتىن ادامدار سانى ءۇش ەسە ارتقانىن حابارلاعان.
2019 - جىلى س س س ر- دا جاپپاي قىرىپ- جويۋ رەپرەسسياسىنىڭ باستالعانىنا 82 جىل تولادى. قازاقستان دا ودان تىس قالمادى. زەرتتەۋشىلەردىڭ ايتۋىنشا، سوۆەت بيلىگى كەزىندە قازاق س س ر- ىندە 3,5 ميلليون ادام رەپرەسسياعا ۇشىراعان. تۇتقىنداۋ مەن اتۋ جازاسىنىڭ باسىم كوبى بيلىكتە يوسيف ستالين وتىرعان كەزدە بولدى.