گۇلشارا ءابدىحالىقوۆا جاعدايى تومەن وتباسىلارعا كورسەتىلەتىن كومەكپەن تانىستى - الماتى وبلىسى

تالدىقورعان. قازاقپارات - الماتى وبلىسىنا جۇمىس ساپارىمەن كەلگەن ۇكىمەت باسشىسىنىڭ ورىنباسارى گۇلشارا ءابدىحالىقوۆاعا الماتى وبلىسىنىڭ «الەۋمەتتىك كارتاسى» تانىستىرىلدى، دەپ حابارلايدى قازاقپارات ءتىلشىسى.

وبلىس اكىمى اماندىق باتالوۆتىڭ ايتۋىنشا، ايماقتاعى الەۋمەتتىك قولداۋدى قاجەت ەتەتىن تۇرعىنداردى قولداۋعا 3 ميلليارد تەڭگە كولەمىندە قوسىمشا قارجى بولىنگەن.

بۇل قاراجات «الەۋمەتتىك كارتا» بويىنشا جۇمسالماق. الەۋمەتتىك قامتۋ نەگىزىندە كوپبالالى وتباسىلاردى باسپانامەن قامتۋ، وسى ساناتتاعى اۋلەتتىڭ بالالارىنىڭ جوعارى ءبىلىم الۋىنا جاعداي جاساۋ، جۇمىسپەن قامتۋ سياقتى شارالار جۇزەگە اسىرىلۋدا.

«وبلىس ورتالىعىندا كوپ بالالى وتباسىلار ءۇشىن كوپ قاباتتى ەكى ءۇيدىڭ جوباسىن ازىرلەۋ جۇمىسى باستالدى، كوتتەج قالاشىعىنان دا ءۇي ءبولۋ مۇمكىندىكتەرى قاراستىرىلۋدا. سونداي-اق، «7-20-25» باعدارلاماسى بويىنشا دا قۇنى 1 ميلليون تەڭگە بولاتىن تۇرعىن ءۇي سەرتيفيكاتىن بەرۋدى باستادىق. قازىرگى قۇنى سەرتيفيكاتتىڭ جيىنتىق قورى 300 ميلليون تەڭگەگە جەتتى»، - دەدى «الەۋمەتتىك كارتانى» تانىستىرۋ بارىسىندا وبلىس اكىمى اماندىق باتالوۆ.

ال از قامتىلعان جانە كوپ بالالى وتباسىلارىنىڭ بالالارىنا جوعارى وقۋ ورىندارىندا ءبىلىم الۋى ءۇشىن بولىنەتىن گرانت سانىن تاعى دا جۇزگە كوبەيتۋ كوزدەلۋدە. بۇل ماقساتقا 44,3 ميلليون تەڭگە قارجى قاراستىرىلعان. قازىر دە وبلىس اكىمىنىڭ ارنايى گرانتى بويىنشا 246 ستۋدەنت ءتۇرلى وقۋ ورىندارىندا ءبىلىم الىپ جاتىر. از قامتىلعان وتباسىلار بالالارى ءۇشىن مەكتەپتە ىستىق تاماقپەن قامتۋ 100 پروتسەنتكە جەتتى. بۇگىندە وبلىس اۋماعىنداعى مەكتەپتەردە 32 مىڭ بالا تەگىن ىستىق تاماقپەن، مەكتەپ فورماسىمەن، جازعى دەمالىس كەزىندەگى دەمالىس لاگەرىمەن قامتاماسىز ەتىلدى.

«الەۋمەتتىك كارتا» بويىنشا ەندى تالدىقورعان قالاسىندا تۇراتىن كوپبالالى انالار قوعامدىق كولىكتە تەگىن جۇرەدى. بۇعان دەيىن وسىنداي تەگىن جول ءجۇرۋ مۇمكىندىگىن وبلىس ورتالىعىنداعى 42 مىڭ مەكتەپ وقۋشىسى مەن ستۋدەنتتەر پايدالانىپ كەلگەن بولاتىن. قازىر وبلىس اۋماعىندا كوگىلدىر وتىن كوزىنە قوسىلۋ قارقىندى ءجۇرىپ جاتىر. تابيعي گازعا قوسۋ ءىسى بويىنشا دا الەۋمەتتىك جاعىنان از قامتىلعان وتباسىلارىنا جەڭىلدىك قاراستىرىلىپ وتىر ەكەن. بۇل ماقساتقا قازىنادان 500 ميلليون تەڭگە بولىنگەن.

جالپى ۇكىمەت مۇشەلەرىنىڭ نازارىنا ۇسىنىلعان جەتىسۋدىڭ «الەۋمەتتىك قورعاۋ» كارتاسى وبلىستاعى 253 اۋىلدىق وكرۋگ تۇرعىندارىنىڭ الەۋمەتتىك جاعدايىن زەردەلەۋ نەگىزىندە جاسالدى. قازىر اۋداندار بويىنشا بۇل ءتىزىم جەتىلدىرىلىپ، «ە-حالىق» اقپاراتتىق جۇيەسىنە قوسىلۋدا. سونداي-اق، بارلىق اۋداندا كوپبالالى جانە از قامتىلعان وتباسىلارىنا «ءبىر تەرەزە» قاعيداتىمەن قىزمەت كورسەتەتىن ورتالىقتار اشىلۋدا.