قورقور تارتۋعا رۇقسات ەتىلگەن ورىن يەلەرى تەكسەرىستىڭ جيىلەپ كەتۋىنە شاعىمداندى
بۇل تۋرالى بۇگىن نۇر-سۇلتان قالالىق كاسىپكەرلەردىڭ قۇقىعىن قورعاۋ جانە سىبايلاس جەمقورلىققا قارسى ءىس-قيمىل كەڭەسىنىڭ وتىرىسىندا «ق ر رەستوراتورلار كلۋبى» ز ت ب پرەزيدەنتى ۆەرونيكا نۇرپەيىسوۆا ايتتى، دەپ حابارلايدى قازاقپارات ءتىلشىسى.
«بۇل ورىن- جايلاردىڭ بارلىعىن قايتا جابدىقتاۋ ءۇشىن وتە كوپ قاراجات قاجەت. سوندىقتان كۇشتىك قۇرىلىمداردىڭ تەكسەرمەۋىنە ۋاقىتشا موراتوريي ەنگىزۋدى سۇرايمىز. قازىرگى ۋاقىتتا كۇشتىك قۇرىلىمدار دورەكى تۇردە كەلەدى، ەشقانداي ۇيعارىمدارى جوق. ءتىپتى قانداي كوماندا نەمەسە توپ بولۋى كەرەكتىگىن، ول قانداي ادامداردان جاساقتالۋى كەرەكتىگىن بىلمەيمىز»، - دەدى ول.
ونىڭ ايتۋىنشا، قۇقىق قورعاۋ ورگاندارى جازىپ بەرەتىن ايىپپۇلدىڭ كولەمى 1 ايلىق ەسەپتىك كورسەتكىشتەن باستالىپ، 30 ا ە ك- كە جەتىپ جىعىلادى.
«تەمەكى، سونىمەن قاتار تەمەكى ەمەس قورقور قوسپاسى دەگەن تۇسىنىك بار. قازىرگى ۋاقىتتا بىزدە رەسەيدەگىدەي جاساۋ قاجەت. ول جاقتا بۇل تەمەكى، ءبىراق جەمىستەن جاسالعان تۇزدىقپەن جانە شارباتپەن ارالاستىرىلعان دەپ ءبولىپ تاستاعان. بىزدە زاڭنامالىق تۇرعىدا نيكوتينى بار تەمەكى جانە تەمەكىسىز قورقور دەپ ءبولىپ تاستاۋدى ۇسىنامىز»، - دەدى ۆەرونيكا نۇرپەيىسوۆا.
ال نۇر-سۇلتان قالالىق جەرگىلىكتى پوليتسيا قىزمەتى باسقارماسىنىڭ باستىعى تاحير ءابدىراحمانوۆ كوڭىل كوتەرۋ ورىندارىن تەكسەرۋ نەگىزىنەن ازاماتتاردىڭ شاعىمدارى بويىنشا جانە زاڭناما تالاپتارى قاتاڭ ساقتالا وتىرىپ تەكسەرىلەتىندىگىن ايتىپ وتىر.