قازاق جىرشىسى حالىقارالىق جىرشىلار دوداسىنىڭ باس جۇلدەسىن يەلەندى
«حالىقارالىق باحشى (جىرشى) ونەرىنىڭ فەستيۆالى» بيىل ءبىرىنشى رەت وزبەكستان رەسپۋبليكاسىنىڭ تەرمەز قالاسىندا ءوتتى. ونىڭ اشىلۋ سالتاناتىنا وزبەكستان پرەزيدەنتى شاۆكات ميرزيەيەۆ قاتىستى.
فەستيۆال اياسىندا، سونداي-اق ۇلتتىق تاعامداردىڭ، قولونەر بۇيىمدارىنىڭ، حالىقتىڭ سالت- داستۇرىنە قاتىستى جادىگەرلەردىڭ جارمەڭكەسى ۇيىمداستىرىلدى.
بەس كۇنگە سوزىلعان شاراعا قازاقستان، كورەيا، موڭعوليا، مالايزيا، ماجارستان، سەربيا، باشقۇرتستان، تۇرىكمەنستان، تۇركيا، ازەربايجان، بولگاريا، قىرعىزستان سىندى 74 مەملەكەتتەن 160-تان استام ونەرپاز قاتىستى.
قازاقستاننىڭ اتىنان ونەر دوداسىنا سىر بويىنداعى جىراۋلىق مەكتەپتىڭ ۇلكەن وكىلى، بەلگىلى بيداس رۇستەمبەكوۆتىڭ شاكىرتى، جىرشى ۇلجان بايبوسىنوۆا قاتىستى. دودانىڭ قورىتىندىسى بويىنشا ول باس جۇلدەنى ۇتىپ الىپ، ونەرىمىزدىڭ ابىرويىن اسقاقتاتتى.
ۇلجان بايبوسىنوۆا - ىقىلاس اتىنداعى حالىق مۋزىكالىق اسپاپتار مۋزەيىنىڭ ديرەكتورى، قۇرمانعازى اتىنداعى قازاق ۇلتتىق كونسەرۆاتورياسىنىڭ اعا وقىتۋشىسى، «فرانسيا ادەبيەتى مەن ونەرىنىڭ كاۆالەرى» وردەنىنىڭ يەگەرى، قازاقستاننىڭ ەڭبەك سىڭىرگەن قايراتكەرى.
ەسكە سالايىق، كەشە تاشكەنتتە وزبەكستانداعى قازاقستان جىلىنىڭ اشىلۋ سالتاناتى ءوتتى. قازاقستاندىق ارتىستەردىڭ گالا-كونسەرتىن ەكى مەملەكەتتىك باسشىلارى قاسىم-جومارت توقايەۆ پەن شاۆكات ميرزيەيەۆ تاماشالادى.