تارازدا عيماراتتان سەكىرمەك بولعان بويجەتكەن قۇتقارىلدى

نۇر-سۇلتان. قازاقپارات - تارازدا قۇرىلىسى تولىق اياقتالماعان عيماراتتان سەكىرمەك بولعان بويجەتكەن قۇتقارىلدى.

بۇل جايىندا ق ر ءى ءى م توتەنشە جاعدايلار كوميتەتىنىڭ رەسمي وكىلى نۇرسۇلتان نۇراحمەت ايتتى، دەپ حابارلايدى قازاقپارات ءتىلشىسى.

ونىڭ دەرەگىنشە، 2019 -جىلعى 15 -ساۋىردە، ساعات 17.00 شاماسىندا جامبىل وبلىستىق پوليتسيا دەپارتامەنتىنىڭ جەدەل كەزەكشىسىنە «بوكس سارايى» سپورت كەشەنىنىڭ جانىندا، كوروليەۆا كوشەسى بويىنداعى قۇرىلىسى اياقتالماعان عيماراتتان بەلگىسىز بويجەتكەننىڭ سەكىرمەك بولعانى تۋرالى حابارلاما تۇسكەن. قولدانىستاعى نۇسقاۋلىقتارعا سايكەس وقيعا ورنىنا جامبىل وبلىستىق توتەنشە جاعدايلار دەپارتامەنتى بولىمشەلەرىنەن 19 قىزمەتكەر جانە 5 تەحنيكا جىبەرىلگەن.

«وقيعا ورنىندا جەكە قۇرام قۇتقارۋ قالقاسىن ورناتتى. №1 -ءورت ءسوندىرۋ ءبولىمىنىڭ ءورت- ءسوندىرۋشى- قۇتقارۋشىسى، ازاماتتىق قورعاۋ سەرجانتى ازامات كوپبوسىنوۆ 5 قاباتتى بيىكتىككە ءورت ءسوندىرۋ اۆتوساتىسىمەن كوتەرىلدى. ول ءوز ومىرىمەن تاۋەكەل ەتىپ، سۋيتسيدتىڭ الدىن الىپ، بويجەتكەننىڭ ءومىرىن قۇتقارىپ قالدى»، - دەدى ول.