ماقپال ءجۇنىسوۆا جالعىز قىزىن قالاي باقىلاۋدا ۇستايدى؟

 نۇر-سۇلتان. قازاقپارات - ماقپال ءجۇنىسوۆا بويجەتىپ قالعان جالعىز قىزى ءۇشىن الاڭداپ جۇرگەنىن جاسىرمادى.

حالىق ءارتىسى ءتىپتى كينوتەاترعا ءجيى بارۋدى ادەتكە اينالدىرعان مەرەيدى ارنايى ادامداردىڭ كومەگىمەن باقىلايتىنىن اشىپ ايتتى دەپ جازادى «31» ارنانىڭ «ايتا بەرسىن» باعدارلاماسىندا.

«ويبۋ، قازىر باقىلاۋ ودان سايىن ارتىپ كەتتى. قىز بالاسى بولعاننان كەيىن... قازىر بۇلاردىڭ ورتاسى دا كەڭەيىپ جاتىر عوي. ءبىر-بىرىمەن تانىسادى، كەزدەسكىلەرى كەلەدى.

كينوعا ءجيى باراتىن بولدى مىسالى. ءاربىر دۇكەنى بار كينوتەاتردا ءوزىمنىڭ شپيوندارىم بار. «بۇگىن مەنىڭ قىزىم ءسىز جاققا كەتىپ بارا جاتىر» دەپ... سەنەسىڭ، ءبىراق تەكسەرىپ وتىراسىڭ.

ويتكەنى ءبىز قىزىمىز ەكەۋمىز اناسى مەن بالاسى سياقتى ەمەسپىز. ءبىز كادىمگىدەي سىرلاس، قۇرداس سياقتى. بويى مەنەن ۇزارعان سايىن قۇربىم سياقتى بولىپ كەتتى.

سوسىن وعان «مەنەن ۇيالماي، بارلىق سۇراقتاردى سۇراي بەر. سوسىن بىرەۋمەن تانىساتىن بولساڭ، ونى دا ماعان ايت. باسىڭدى جۇلىپ المايمىن. كەسىپ المايمىن. ءبىراق مەن كىممەن ارالاسىپ ءجۇرسىڭ، ءبىلىپ جۇرەيىن. قاي جاقتىڭ بالاسى نەمەسە قىزى؟» دەپ ايتىپ قويعانمىن.

ول مىندەتتى تۇردە جىگىتتەرمەن ارالاسۋ ەمەس. كەيدە قىزداردىڭ ءوزى جامان ورتاعا الىپ كەتۋى مۇمكىن. ۇيدە قانشا تاربيە بەرسەڭ دە، كىممەن قانداي اڭگىمە قۇرعانىن مەن ءبىلىپ وتىرۋىم كەرەك.

مەرەيگە «سەن ەشتەڭە جاسىرما. ساعان بىرنارسە بولسا، مەن ارالاساتىن ادامىڭدى بىلمەي قالسام... قۇداي ءوزى ساقتاسىن. ماعان ايتادى عوي «سەن قانداي اتا-اناسىڭ؟ كىممەن ارالاساتىنىن، قايدا جۇرگەنىن بىلمەيسىڭ» دەپ كىنانىڭ ءبارىن ماعان تاعادى» دەپ ايتتىم»، - دەيدى ماقپال ءجۇنىسوۆا.

سونداي-اق، ءانشى قىزى مەرەيدىڭ مەكتەپ بىتىرگەن سوڭ شەتەلدە ءبىلىم الۋدى ارماندايتىنىن جەتكىزدى.

«ەندى قىزىم «مەكتەپ بىتىرگەننەن كەيىن قازاقستاندا قالامىن» دەگەن ۋادەلى ءسوزى بار ەدى. ال بيىلعى اڭگىمەسى باسقاشا. «مەن دەگەنمەن دە شەتەلدە وقيتىن شىعارمىن» دەگەن اڭگىمە شىقتى.

مەن «سوندا مەن قايدا قالام؟» دەپ ايتتىم. قىزىم «مەنىمەن باراسىز» دەيدى. ەندى ەكى-ۇشتى ويدا وتىرمىز. قىز بالانى جالعىز شەتەلگە جىبەرۋ جاعىنان قورقىپ ءجۇرمىن.

ويلاپ قويامىن. «شەتەلگە كەتكەنشە، شەت ەلگە باراتىن ءبىر قازاقپەن تانىسسا ەكەن. سول جاققا بىرگە بارىپ، بىرگە وقىسا ەكەن» دەگەن ارماندار بولىپ جاتىر. ەلدىڭ ءبارى جىبەرىپ جاتقاسىن، مەن دە ويلانىپ قالدىم. بىلمەيمىن ەندى. ازىرگە شەشىلە قويعان جوق»، - دەدى حالىق ءارتىسى.