ديماشقا عاشىق بولعان پورتۋگاليالىق قىز قازاقشا اندەر ورىنداۋعا كوشكەن
ونەر يەسى «دۋدار-اي»، «ۇمىتىلماس كۇن» اندەرىن شىرقاۋ ارقىلى جەلىنى «جاردى».
NUR. KZ ءتىلشىسى ارتىسپەن تىلدەسىپ، قازاقتىڭ مادەنيەتىن نەگە جاقسى كورىپ قالعانىن سۇرادى.
18 جاستاعى پورتۋگاليالىق قىزدىڭ سوزىنشە، قازاقستان تۋرالى ديماش قۇدايبەرگەن قىتايداعى Singer جوباسىنا قاتىسقان كەزدە ءبىر-اق بىلگەن.
«قىتايداعى«the Singer» شوۋىن كورگەن كەزدە ديماشتىڭ تالانتىنا تاڭداي قاقتىم. ونىڭ ورىنداۋىنداعى «All by myself» ءانى ەسىمنەن تاندىردى.
ديماشتى تىڭداۋ ارقىلى ونىڭ تالانتىنا عاشىق بولدىم.
ءاندى تۇسىنە الاتىن جان رەتىندە ايتاتىن بولسام، ول - الەمدەگى ەڭ ادەمى داۋىس يەسىنىڭ ءبىرى.
ديماشتىڭ ورىنداۋ تەحنيكاسى، مۋزىكانى جەتكىزە الۋى، ەموتسياسى وتە تاماشا»، - دەدى لارا.
لارا الەسيو قازاقتىڭ مادەنيەتىن جاقسى كورىپ قالعانىن العا تارتىپ، قازاقستانعا قوناق بولىپ كەلۋدى جوسپارلاپ جۇرگەنىن جاسىرمادى.
«مەنىڭ جوسپارىمدا قازاقستانعا ساياحات جاساۋ بار. قاي كۇنى ەكەنىن ناقتى بىلمەيمىن. ءبىراق بۇنى مىندەتتى تۇردە ورىندايمىن.
الماتى، نۇر-سۇلتان، اقتاۋ جانە اقتوبەنى كورگىم كەلەدى. كوپتەگەن تالانتتى انشىلەردى تاربيەلەپ شىعارعان مەملەكەتپەن تانىسقىم كەلەدى.
قازاقستاننىڭ جانكۇيەرلەر الەمدەگى شىنايى جانداردىڭ قاتارىندا. مەن «ءساتسىز بولاتىن شىعار» دەپ قازاق تىلىندە ءان ورىنداۋعا قورىقتىم.
ءبىراق قازاقستاندىقتار مەنى قولداپ، شەشىم شىعارۋعا جىگەر سىيلادى»، - دەدى جاس ءانشى.
ول پورتۋگاليادا ديماشتىڭ كوپتەگەن ادامدارعا ۇنايتىنىن جەتكىزدى.
«مەنىڭ ەلىمدە ديماشتىڭ اندەرىن ءسۇيىپ تىڭدايتىن تۇرعىندار وتە كوپ. قازىر پورتۋگاليا ەكى قازاقستاندىقتى جاقسى بىلەدى. ولار ديماش پەن بوكسشى گولوۆكين»، - دەدى لارا.
جاس ءانشى قازاق تىلىندە ءان شىرقاپ قانا قويماي، قازاق ءتىلىن مەڭگەرۋدى باستاپ كەتكەنىن تىلگە تيەك ەتتى.
«مەن قازىردىڭ وزىندە قازاق تىلىندە بىرنەشە تىركەستى جاتقا بىلەمىن. ولار «مەن سەنى سۇيەمىن»، «سالەمەتسىز بە» جانە «راقمەت»، - دەپ اعىنان جارىلدى پورتۋگاليالىق ونەر يەسى.