ۇكىمەت سايلاۋعا جۇمسالاتىن قارجىنىڭ ناقتى سوماسىن جاريالادى

نۇر-سۇلتان. قازاقپارات - ق ر پرەمەر-ءمينيسترىنىڭ ورىنباسارى - قارجى ءمينيسترى ءاليحان سمايىلوۆ پرەزيدەنتتىك سايلاۋعا جۇمسالاتىن قارجىنىڭ ناقتى سوماسىن اتادى، دەپ حابارلايدى قازاقپارات ءتىلشىسى.

«مينيسترلەر كابينەتىنىڭ بۇگىنگى وتىرىسىندا ءبىز ۇكىمەتتىڭ رەزەرۆىنەن سايلاۋدى وتكىزۋگە 9,4 ميلليارد تەڭگەنى بولۋگە شەشىم قابىلدادىق. اتالعان قاراجات رەسپۋبليكا بويىنشا اشىلاتىن 10 مىڭعا جۋىق سايلاۋ ۋچاسكەسىنىڭ جۇمىسىن ۇيىمداستىرۋعا جۇمسالادى. ول جەرلەردە 70 مىڭعا جۋىق ادام ىستەيدى. ارينە، ول قارجىنىڭ باسىم بولىگى سايلاۋ ۋچاسكەلەرىندە جۇمىس ىستەيتىن ادامداردىڭ جالاقىسىنا باعىتتالادى»، - دەدى ءا. سمايىلوۆ

ونىڭ ايتۋىنشا، باستاپقى سوما ايماقتاردان تۇسكەن تاپسىرىستاردىڭ نەگىزىندە جاسالعان بولاتىن. ارتىنان ۇكىمەت ءاربىر ايماقتا اشىلاتىن سايلاۋ ۋچاسكەلەرى مەن ول جەردە جۇمىس ىستەيتىن ادامداردىڭ سانىن ناقتىلادى.

«ءسويتىپ، 9,4 ميلليارد تەڭگە كولەمىندەگى سومانى شىعاردىق»، - دەپ اتاپ كورسەتتى ءا. سمايىلوۆ.

ايتا كەتەيىك، ۇكىمەتتىڭ بۇگىنگى وتىرىسىندا ق ر پرەمەر-ءمينيسترى اسقار مامين نەگىزگى كاپيتالعا سالىناتىن ينۆەستيتسيالار بويىنشا جۇمىستى كۇشەيتۋدى تاپسىردى.

الداعى ۋاقىتتا ۇكىمەت شەتەلدىك ينۆەستيتسيالاردى تارتۋدىڭ جاڭا تاسىلدەرىن تالقىلايدى.

ال «سامۇرىق-قازىنا» قورىنىڭ باسشىسى احمەتجان ەسىموۆ شەتەلدە قوردىڭ اكتيۆتەرىنە ارەست سالۋ ماسەلەسىن كوتەردى.