ۆلاديمير پۋتين مەن كيم چەن ىن تاياۋدا كەزدەسۋى مۇمكىن

نۇر-سۇلتان. قازاقپارات- سولتۇستىك كورەيا ليدەرى كيم چەن ىن مەن رەسەي پرەزيدەنتى ۆلاديمير پۋتين كەلەر اپتادا كەزدەسىپ، كەلىسسوز وتكىزۋى مۇمكىن. بۇل تۋرالى كرەملدەگى دەرەككوزدەرىنە سىلتەمە جاساپ، Yonhap اگەنتتىگى حابارلادى.

«كيم چەن ىن ءساۋىر سوڭىندا رەسەيگە ساپارلاپ كەلۋى مۇمكىن» دەپ جازادى اگەنتتىك. باسىلىمنىڭ جازۋىنشا، جيىن ۆلاديۆوستوكتا وتەدى.

Yonhap-تىڭ جازۋىنشا، پۋتين 26-27 - ساۋىردە قىتايدا وتەتىن «ءبىر بەلدەۋ - ءبىر جول» فورۋمىنا قاتىسادى. اگەنتتىك دەرەككوزى «پۋتين مەن كيمنىڭ كەزدەسۋى وسى فورۋمنان بىرەر كۇن بۇرىن نە كەيىن وتەدى» دەيدى.

بۇعان دەيىن اگەنتتىك سولتۇستىك كورەيا مەملەكەتتىك كەڭەسى باسشىسىنىڭ ورىنباسارى كيم چحان سون 19-25 - ناۋرىزدا ماسكەۋ مەن ۆلاديۆوستوكتا بولعانىن حابارلاعان. اگەنتتىك دەرەگىنشە، كيم كومەكشىسىنىڭ رەسەيگە كەلۋى - سولتۇستىك كورەيا ليدەرىنىڭ ساپارى الدىنداعى دايىندىق شاراسى.

www.azattyq.org