ءۇش ايدا جالپى ىشكى ءونىم ءوستى - اسقار مامين
ۇكىمەت باسشىسىنىڭ ايتۋىنشا، بيىل قاڭتار-ناۋرىز ايلارىندا جالپى ىشكى ءونىم 3,8 پايىزعا ءوستى. اسىرەسە، قۇرىلىس، ساۋدا، تاۋ-كەن ونەركاسىبى مەن كولىك سالاسىنىڭ ءوسىمى بارىنشا بايقالادى.
«نەگىزگى كورسەتكىشتەر بويىنشا ءبىرىنشى توقساندا شىعىس قازاقستان، اتىراۋ، قوستاناي، پاۆلودار مەن قىزىلوردا وبلىستارى جاقسى ناتيجەگە جەتتى. سونىمەن قاتار، اقمولا وبلىسىندا جانە ەلوردادا قۇرىلىس پەن ينۆەستيتسيالار بويىنشا كورسەتكىشتەر تومەندەپ كەتكەن. وسى باعىتتاعى جۇمىستاردىڭ ناشار دەڭگەيدە ۇيىمداستىرىلعانىن اتاپ وتەمىن»، - دەدى ا. مامين مينيسترلەر كابينەتىنىڭ بۇگىنگى وتىرىسىندا.
پرەمەر-ءمينيستردىڭ سوزىنە قاراعاندا، كەيبىر وڭىرلەردە ءىرى ينۆەستيتسيالىق جوبالاردىڭ اياقتالۋىنا بايلانىستى كورسەتكىشتەر تومەندەپ وتىر. وسىعان بايلانىستى ۇكىمەت باسشىسى وسى سالاداعى جۇمىستى، اسىرەسە، قۇرىلىس پەن نەگىزگى كاپيتالعا سالىناتىن ينۆەستيتسيالار بويىنشا جۇمىستى كۇشەيتۋدى تاپسىردى.
«اتالعان ماسەلەلەر بويىنشا شۇعىل تۇردە ءتيىستى شارالاردى قابىلداۋ قاجەت. سونداي-اق، ورتالىق مەملەكەتتىك جانە جەرگىلىكتى اتقارۋشى ورگاندار بيۋجەت قاراجاتىن ۋاقىتىلى ءارى تولىق يگەرۋى كەرەك»، - دەپ اتاپ كورسەتتى ا. مامين.