دۇنيەاۋي قاجەتى وتەلگەن ادامنىڭ جانى جاي تابا ما؟
«ەلەنا»، «ليەۆيافان»، «ۆوزۆراشەنيە»، «نەليۋبوۆ». اندرەي زۆياگينسەۆ ءبىر سۇحباتىندا ادامداردىڭ بۇل فيلمدەردەن «باقىتتى» شەشىم كۇتىپ الداناتىنىن، سوسىن ول كورەرمەن ايناعا قاراپ تۇرىپ: «جوق! بۇل اينانى شاعۋ كەرەك! ول مەن تۋرالى شىندىقتى دۇرىس ايتىپ تۇرعان جوق!» - دەپ اشۋلاناتىنىن ايتادى. جانە كورەرمەننىڭ وسىنداي كۇيىن «دىتتەگەنىمە ءدوپ ءتۇستىم» دەپ ەسەپتەيدى.
ونىسى راس تا شىعار، رەجيسسەردان فيلم اياقتالار تۇستا كەۋدەسىن كەرە تىنىس الاتىن ستاندارتتى فينال، تۇسىنىكتى شەشىم كۇتكەن كوپ كورەرمەننىڭ ءبىرى مەن ەدىم. جانە سونداي نۇرلى ءۇمىتىمنىڭ ۇرلانعانىنا، ىشكە تارتقان دەمىمنىڭ سىرتقا شىقپاي تۇنشىققانىنا اشۋلانعان ادام دا - ءوزىم. ءبىراق، ءيىرىمى تەرەڭ فيلمدەر مەنى «زۆياگينسەۆ ايناسىنا» (ءبىر ءسات بولسا دا) تۋرا قاراۋعا ماجبۇرلەدى. ول اينادان نە كوردىم؟
قوعام دياگنوزىن تامىرشىداي تاپ باسۋ زۆياگينسەۆتىڭ قولىنان كەلدى.
ءبىز كوپ جاعدايدا، اسىرەسە بۇگىن سانا سىلكىنىسىن ادەمى ءومىردى، جارقىن بولاشاقتى، كوڭىلدى ساتتەردى ايتىپ تامساندىراتىن موتيۆاتورلاردىڭ كەزدەسۋىنەن ىزدەيمىز. مەنىڭشە، زۆياگينسەۆتىڭ موتيۆاتسياسى (جاسىرىن قايراۋى) بىرەۋدىڭ سەنى ەمەس، ءوزىڭدى ءوزىڭ قايراۋىڭنان تۇرادى، ءوزىڭنىڭ ومىرلىك ماسەلەلەردەگى قابىلداعان، قابىلداناتىن شەشىمدەرىڭنەن تۇرادى.
«ەلەناسىنان» باستايىقشى. مەيىربيكە ايەل بالاسىنىڭ جاقسى ءومىرى، نەمەرەسىنىڭ الاڭسىز بولاشاعى ءۇشىن كەيىنگى ناۋقاس كۇيەۋىن تۇنشىقتىرىپ ولتىرەدى...
رەجيسسەر كينو ءتۇسىرۋ بارىسىندا وزىنە بريتاندىق پروديۋسەردىڭ «كۇلكىلى» يدەيا ايتقانىن جازادى. وندا پروديۋسەر رەجيسسەرعا: «ەلەنانىڭ بۇل ارەكەتىن بالا كەزىندە العان ءبىر جان جاراقاتىمەن بايلانىستىرايىق»- دەپتى.
«مەن ءۇشىن بىرەۋدىڭ جاساعان ارەكەتىنىڭ سەبەبىن ءتۇسىندىرۋ - ادىلەتسىزدىك! ونىڭ سول ساتتەگى شەشىمى عانا ادىلەتتى! مەن سونى عانا كورسەتەم»- دەيدى زۆياگينسەۆ. ياعني، ەلەنانىڭ تاڭداۋى وسى بولدى. ەندى دۇنيەۋي قاجەتى وتەلگەن ادامنىڭ جانى جاي تابا ما، قالاي ويلايسىز؟ ءجىبى ۇزىلگەن قوڭىراۋدىڭ توقتاۋسىز بەبەۋىن تىڭداۋعا قۇلاق، قورىتۋعا مي، كوتەرۋگە جۇرەك شىداي ما؟
«ليەۆيافان»، «ۆوزۆراشەنيە»، «نەليۋبوۆ» فيلمدەرى ءتىپتى تەرەڭ...