قازاقستان مەن وزبەكستان ءبىرقاتار ەكىجاقتى قۇجاتتارعا قول قويدى
اتاپ ايتقاندا، بەكىتىلگەن قۇجاتتاردىڭ اراسىندا ق ر پرەزيدەنتى قاسىم- جومارت توقايەۆ پەن وزبەكستان پرەزيدەنتى شاۆكات ميرزييەۆتىڭ بىرلەسكەن مالىمدەمەسى بار.
بۇدان بولەك، ەكى ەل ۇكىمەتتەرى اراسىندا ەڭبەك قىزمەتى جانە ەڭبەك- ميگرانتتارى قۇقىقتارىن قورعاۋ كەلىسىمىنە، سونداي- اق زاڭسىز كوشى- قونمەن كۇرەس بويىنشا ىنتىماقتاستىق تۋرالى كەلىسىمگە قول قويىلدى.
بەلگىلى بولعانداي، قازاقستان مەن وزبەكستان سىرتقى ىستەر مينيسترلىكتەرى اراسىندا 2019-2020 -جىلدارعا ارنالعان ىنتىماقتاستىق باعدارلاماسىنا، ەكى ەل قورعانىس مينيسترلىكتەرى اراسىندا اۋە شابۋىلىنا قارسى قورعانۋ سالاسىنداعى ىنتىماقتاستىق تۋرالى كەلىسىمگە قول قويىلدى.
قازاقستان قورعانىس مينيسترلىگى مەن وزبەكستان قورعانىس مينيسترلىگى اراسىندا اسكەري ايەرودرومداردا قابىلداۋدى، اۋەايلاقتىق- تەحنيكالىق قامتاماسىز ەتۋدى جانە اسكەري اۋە كەمەلەرىن قورعاۋدى ۇيىمداستىرۋ تۋرالى كەلىسىم بەكىتىلدى.
مۇنىمەن قوسا، ق ر ۇلتتىق ەكونوميكا مينيسترلىگى مەن وزبەكستاننىڭ ينۆەستيتسيا جانە سىرتقى ساۋدا مينيسترلىگى اراسىندا «ورتالىق ازيا» ساۋدا ەكونوميكالىق ىنتىماقتاستىق حالىقارالىق ورتالىعىن قۇرۋ ماسەلەسى بويىنشا ءوزارا قارىم- قاتىناس جونىندەگى مەموراندۋمعا قول قويىلدى.
سونىمەن قاتار، ق ر اقپارات جانە قوعامدىق دامۋ مينيسترلىگى مەن وزبەكستان مينيسترلەر كابينەتى جانىنداعى ءدىن ىستەرى كوميتەتى ىنتىماقتاستىق تۋرالى مەموراندۋمعا قول قويدى.
ەستەرىڭىزگە سالا كەتەيىك، قازاقستان رەسپۋبليكاسىنىڭ پرەزيدەنتى قاسىم- جومارت توقايەۆ مەملەكەتتىك ساپارمەن وزبەكستان رەسپۋبليكاسىنا كەلدى.
اۆتور: رۋسلان عابباسوۆ