ءبىلىم ءمينيسترى جالاقىنىڭ قالاي ارتاتىنىن ناقتى مىسالمەن ءتۇسىندىردى
ۇكىمەت ۇيىندە وتكەن باسپا ءسوز ءماسليحاتىندا ك. ءشامشيدينوۆا ارنايى سلايدتاردى كورسەتىپ، ناقتى مىسالداردى دا كەلتىردى. ماسەلەن، قالادا جۇمىس ىستەيتىن الەۋمەتتىك پەداگوگ، كىتاپحاناشى مەن تاربيەشى 2-3 ەڭبەك وتىلىمەن 55869 تەڭگە السا، 1 - ماۋسىمنىڭ باستاپ ولاردىڭ ايلىعى 70859 تەڭگەگە دەيىن ارتادى. ال اۋىلدا 69837 تەڭگەدەن 88573-گە دەيىن كوتەرىلەدى. سول سياقتى تاربيەشىنىڭ كومەكشىسى قالادا 54117 تەڭگە السا، جالاقى كوتەرىلگەننەن كەيىن اتالعان سوما 63904 تەڭگە بولادى.
اۋىلدا وسى ساناتتاعى مامانداردىڭ ايلىعى 67713 تەڭگەدەن 79880-گە دەيىن ۇلعايادى. بۇدان بولەك، قالادا پەداگوگ- پسيحولوگتىڭ ايلىعى 81565، ال اۋىلدا 101957 تەڭگە بولادى. قازىر 2-3 جىلدىق ەڭبەك ءوتىلى بار جاس مۇعالىمدەر قالادا 55480 تەڭگە السا، الداعى ۋاقىتتا ولاردىڭ ايلىعى 66382 تەڭگەگە دەيىن كوتەرىلەدى. ال اۋىلدا جاس مۇعالىمدەردىڭ جالاقىسى 82976 تەڭگە بولادى.
ايتا كەتەيىك، بۇگىنگى بريفينگتە ءبىلىم ءمينيسترى ارنايى تاريفتىك كوەففيتسەنتتىڭ بەكىتىلگەنىن مالىمدەدى. ال ق ر ءبىلىم جانە عىلىم مينيسترلىگى ەسەپتەۋ جۇمىستارىن باستاپ كەتتى.
«وسى ورايدا ايتا كەتەتىن ماسەلە، جالپى بيۋدجەت سالاسىنداعى جالاقىسى تومەن قىزمەتكەرلەردىڭ ايلىعىن كوبەيتۋگە ارنالعان قارجىنىڭ 75 پروتسەنتى ءبىلىم سالاسىنا ءبولىنىپ وتىر. جالاقى 1 - ماۋسىمنان باستاپ كوتەرىلەتىن بولادى. نەگىزگى پەرسونالدىڭ ايلىعى كوتەرىلەدى. ولاردىڭ ىشىندە ەڭبەك ءوتىلىن ەندى عانا باستاعان جاس مۇعالىمدەر، كوللەدج ۇستازدارى، پسيحولوگتار، بالاباقشالاردىڭ جەتەكشىلەرى، تاربيەشىلەرى مەن كومەكشىلەرى، سونىمەن قاتار، قوسىمشا ءبىلىم بەرۋ جۇيەسىندە جۇمىس ىستەيتىن قىزمەتكەرلەر بار»، - دەدى ك. ءشامشيدينوۆا ۇكىمەت ۇيىندە وتكەن باسپا ءسوز ءماسليحاتىندا.
ونىڭ سوزىنە قاراعاندا، كومەكشى پەرسونالدىڭ جالاقىسى دا ارتادى. ولار - ەدەن جۋۋشىلار، كۇزەتشىلەر، وت جاعۋشىلار، سانتەحنيكتەر مەن ەلەكتريكتەر.
«سوسىن باسقارۋشى پەرسونال بار. ولار - مەكتەپ ديرەكتورلارى مەن ولاردىڭ ورىنباسارلارى»، - دەپ اتاپ كورسەتتى ك. ءشامشيدينوۆا.
اۆتور: ارمان اسقاروۆ