قاراعاندىنىڭ زووباعى سيرەك كەزدەسەتىن جانۋارلارمەن تولىعۋدا
بيىلعى جىلى قاراعاندى حايۋاناتتار باعى «جىلى جۇرەك - جومارت قول» اكسياسىن جالعاستىرۋدا. بۇل ءىس-شارا بيزنەس-قۇرىلىمداردىڭ نازارىن حايۋاناتتار باعىنا اۋدارۋعا باعىتتالعان.
وسىلايشا مەكەمە باسشىلىعى دەمەۋشىلەردىڭ قاراجات ەسەبىنەن جانۋارلار كوللەكتسياسىن تولىقتىرعىسى كەلەدى. ناتيجەسىندە، قاراعاندىلىقتارعا سوڭعى ءبىر جىل ىشىندە الماتى حايۋاناتتار پاركىنەن امۋر جولبارىسى، روستيسلاۆ شيلو اتىنداعى نوۆوسىبىر حايۋاناتتار باعىنان قارا كانادالىق قاسقىر جانە جەكە كاسىپكەردەن فالابەللا ەرگەجەيلى پوني سىيعا تارتىلدى.
«بۇل جانۋارلار تابيعاتتا سيرەك كەزدەسەدى. مىسالى، كانادالىق قارا قاسقىر كۇشىكتەگەندە قاراپايىم كوكبورىلەر سەكىلدى 6-7 كۇشىكتىڭ ورنىنا نەبارى 3-4 كۇشىك تابادى. ال، امۋر جولبارىسى پوپۋلياتسياسىنىڭ ارتقانىن قالايمىز. بۇل جىرتقىشتاردىڭ سانى 40-جىلدارى الەم بويىنشا نەبارى 40 دانا بولدى. بۇگىنگى كۇنى جانۋارلاردى قورعاۋ جونىندەگى بارلىق باعدارلامالاردىڭ ارقاسىندا ولاردىڭ سانى 500 دانادان اسادى. بۇل تۇرعىدا مۇنداي جانۋارلار وتە قاجەت، - دەيدى قاراعاندى حايۋاناتتار باعىنىڭ بيولوگى ەربول بايجانوۆ.
قاراعاندى حايۋاناتتار باعىنىڭ جانۋارلار مەن قۇستار توپتاماسىن قالا تۇرعىندارى دا تولىقتىرۋدا. جاقىندا ولار سۇيىكتى حايۋاناتتار باعىنا ەكى ساندىك قويان، ءتورت قىزىل تاسباقا، ءبىر تىرنا مەن ءتورت كۇركە تاۋىق سىيلاعان.
سونداي-اق قاراعاندىلىق زوولوگتار ءتول الۋ جانە گەندىك قوردى جاڭارتۋ بويىنشا جۇمىس اتقارۋدا. وسىعان بايلانىستى حايۋاناتتار باعىندا جانۋارلاردىڭ جۇپتارىن قۇرۋ ءۇشىن ادىستەر قولعا الىنۋدا.
«ساتىپ الىنعان نەمەسە سىيعا تارتىلعان بارلىق جانۋارلار مىندەتتى كارانتيننەن وتەدى. ءۇش اي ىشىندە ولار وقشاۋلانىپ، كۇتىم جاسالادى. سەبەبى بارلىق قۇستار مەن جانۋارلار تولىقتاي ساۋ كەلمەيدى. كارانتيننەن كەيىن جانۋارلاردىڭ ءبىر-بىرىنە بەيىمدەلۋى كەزەڭ-كەزەڭمەن جۇرگىزىلەدى»، - دەپ ءتۇسىندىردى ورنيتولوگيا ءبولىمىنىڭ باسشىسى زاۋرەش شەرەمبايەۆا.
ايتا كەتەيىك، قاراعاندى مەملەكەتتىك زوولوگيالىق باعى ەلىمىزدىڭ ءۇش ءىرى حايۋاناتتار باعىنىڭ ءبىرى بولىپ تابىلادى. ول 1938-جىلى قۇرىلعان. حايۋاناتتار باعىندا جانۋارلار، قۇستار مەن بالىقتاردىڭ 209 ءتۇرى جانە 1568 داناسى بار.
