يرلانديالىقتار اسىراپ العان قازاق بالاسى قۇسبەگىلىككە قىزىعادى
دۋبليندە جەرگىلىكتى قازاق دياسپوراسى قازاقستاننىڭ ۇلى بريتانياداعى جانە يرلاندياداعى ەلشىلىگىنىڭ قولداۋىمەن باس قوسۋ ۇيىمداستىرىپ، بالالاردىڭ تۋعان جەرى تۋرالى اقپارات الۋلارىنا مۇمكىندىك جاسادى.
يرلانديانىڭ تۇكپىر-تۇكپىرىنەن كەلگەن وتباسىلاردىڭ الەۋمەتتىك نەتۆوركينگىندە ءداستۇرلى اۋەندەر وينالدى، داستارحان جايىلدى. يرلانديالىقتار مەن ولاردىڭ بالالارى شاراعا قازاقتىڭ ۇلتتىق كيىمدەرىن كيىپ كەلدى.
«بىزدە جەرگىلىكتى قازاقتار بار. ولار بىزگە ۇلتتىق تاعامدار ازىرلەۋدى ۇيرەتەدى. ولارمەن تىعىز بايلانىستامىز. قازاق ءتىلىن ۇيرەنەمىز. كىتاپتار ساتىپ الامىز. ۇلىم سانجار بۇركىتشىلىك ونەرگە قىزىعادى»، - دەيدى سانجار- كورماكتىڭ اناسى پولا نايلاند.
ستاتيستيكا بويىنشا ەۋروپا ەلدەرى اراسىندا يرلانديا قازاقستاننان بالا اسىراپ الۋ جاعىنان كوش باستاپ تۇر. بۇل ەلدە جاڭادان اتا-انا تاپقان 150 قاراكوزىمىز ءومىر سۇرەدى.
«بالا اسىراپ الۋ بويىنشا باعدارلاما ءوز جۇمىسىن 15 جىل بۇرىن باستادى. جىل سايىن ءسابيلى بولعان وتباسىلاردىڭ باسىن قوسىپ، ءتۇرلى شارالار وتكىزەمىز، جاڭالىقتارمەن بولىسەمىز. ارالارىندا قازاقستانعا ساياحاتتاپ، ەرەكشە اسەرمەن ورالعاندارى دا بار»، - دەيدى بالا اسىراپ الۋ جونىندەگى مەملەكەتتىك اگەنتتىكتىڭ باسشىسى پاتريتسيا كەري.
شارادا قازاقستاندىق ديپلوماتتار جاڭا وتباسى تاپقان بالالاردىڭ تاريحي وتانىمەن ۇزدىكسىز مادەني بايلانىستا بولۋىنا قولداۋ كورسەتۋدىڭ ماڭىزدىلىعىنا توقتالدى.
سونىمەن قاتار ولار كەزدەسۋلەردى كوپتەپ ۇيىمداستىرۋعا ىقپال ەتۋگە جانە بالالاردىڭ قازاقستانعا ساياحاتتاپ بارۋىنا كومەك كورسەتۋگە دايىن ەكەندىكتەرىن جەتكىزدى.