نۇر-سۇلتان ارقىلى بۇكىل قازاقستانعا قىزىعۋشىلىق ارتادى - باقىت سۇلتانوۆ
«كەشە يسپاندىق Effe تەلەراديو كورپوراتسياسى حالىقارالىق ءىس-شارا اياسىندا بەرگەن سۇحباتىمدى كورسەتتى. پيرەنەي تۇبەگى مەن يسپان ءتىلدى ەلدەردەن كەلۋگە نيەت بىلدىرگەن تۋريستەر ءبىز تۋرالى ءبىرشاما مالىمەت الدى دەپ ويلايمىن. نۇر-سۇلتان قالاسىنىڭ تانىستىرىلىمى استانالىقتاردىڭ بولاشاقتاعى تابىسىنا وڭ ىقپال ەتەتىن بولادى. ەڭ ماڭىزدىسى، باس قالامىز ارقىلى بۇكىل قازاقستانعا قىزىعۋشىلىق ارتادى»، - دەپ جازدى ب. سۇلتانوۆ ءوزىنىڭ فەيسبۋك پاراقشاسىندا.
قالا تۋرالى تانىستىرىلىمدى اكىم «Welcome to Nur- Sultan, try the changes» (نۇر-سۇلتانعا قوش كەلىڭىزدەر، وزگەرىستەردى كورىڭىزدەر!) دەگەن سوزبەن اياقتادى.
«تۋريزم تۇرعىسىنان الىپ قاراعاندا ءبىز ەلىمىزدەگى پروگرەسسيۆتى پروتسەستەردىڭ بارىنشا پايدالى جاعىن قاراستىرۋىمىز قاجەت دەپ ويلايمىن»، - دەدى اكىم.
بۇعان دەيىن حابارلاعانىمىزداي، ەلوردا اكىمى باقىت سۇلتانوۆ ليسسابوندا وتكەن UNWTO- عا مۇشە ەلدەر قالالارىنىڭ باسشىلارى مەن تۋريزم مينيسترلەرىنىڭ فورۋمىنا قاتىستى. دۇنيەجۇزىلىك تۋريستىك ۇيىمنىڭ قالالىق تۋريزم بويىنشا كەلەسى 8- جاھاندىق سامميتى نۇر-سۇلتان قالاسىندا وتەدى.