اۋىرساڭىز، مۋزىكامەن ەمدەلىڭىز
جاعىمدى اۋەن جۇيكەنى تىنىشتاندىرىپ قانا قويماي، سونىمەن قاتار قان اينالۋ جۇيەسىن جاقسارتىپ، تىنىس جولدارىن دا ەمدەيدى. سونداي-اق، اس قورىتۋ جۇمىسىن رەتتەپ، اعزاداعى وزگە اۋرۋلارمەن دە كۇرەسەدى.
مۋزىكانى تىڭداۋدىڭ ناتيجەسىندە جابىرقاۋلىقتان ارىلىپ، ۇيقىڭىز تىنىشتالادى. بويكۇيەزدىكتى جەڭىپ، وزىڭىزگە دەگەن سەنىم نىعايادى. ەستە ساقتاۋ قابىلەتىڭىز ارتىپ، شىعارماشىلىق مۇمكىندىگىڭىز اشىلادى.
جاپوندىق عالىمدار ەمىزۋلى انالارعا مۋزىكانىڭ تيگىزەر پايداسى وراسان ەكەنىن دالەلدەدى. ەمىزۋ كەزىندە ىرعاقتى مۋزىكا قويساڭىز، بالانىڭ دامۋىنا، وي- ءورىسىنىڭ وسۋىنە وڭ ىقپالىن تيگىزەتىن كورىنەدى. مۋزىكا تىڭداپ وتىرىپ ەمگەن بالانىڭ ەستە ساقتاۋ قابىلەتى ارتىپ، شىعارماشىلىققا بەيىمدەلەدى دەگەن قورىتىندى جاساعان.
ال كانادالىق عالىمدار ۇنەمى مۋزىكا تىڭداپ جۇرەتىندەر مەن مۋزىكاعا اۋەسى جوقتاردى سالىستىرىپ قاراعاندا، الدەقايدا ايىرماشىلىقتى بايقاعان كورىنەدى. سونداعى دالەلدەگەندەرى ماتەماتيكالىق ەسەپكە جۇيرىكتىگى انىقتالعان. مۋزىكا تىڭداپ جۇرگەن بالالار كەز كەلگەن ەسەپتى شەمىشكەدەي شاقسا، ال مۋزىكا تىڭداماعاندارى ەسەپتەگىش قۇرالداردىڭ كومەگىنە جۇگىنگەن. ال جۇكتى كەزىندە مۋزىكاعا اۋەستەنىپ، ۇنەمى تىڭداپ جۇرەتىن انالاردان قاعىلەز، شيراق، پىسىق بوبەكتەر تۋىلادى ەكەن.
مۋزىكا كۇيزەلىستى جويىپ، بويىڭىزعا سەرگەكتىك سىيلايدى. جۇمىسقا دەگەن قابىلەتتىلىكتى ارتتىرىپ، زەيىندىلىكتى وياتادى. كەز كەلگەن جۇمىسقا جاۋاپكەرشىلىكتى ارتتىرادى.
بريتاندىق عالىمدار باس اۋرۋلارىن مۋزىكامەن ەمدەۋگە بولاتىنىن دالەلدەگەن. وعان اقىل ەسىندە كەمشىلىگى بارلار، ۇمىتشاقتىق، ينسۋلت العاننان كەيىنگى بولاتىن مي اۋرۋلارىناتاۋعا جاتادى.
مۋزىكانى تىڭداپ قانا قويماي بىرگە ءان شىرقاسا دەل- سالدىقتان ارىلىپ، جابىعۋ مەن كۇيزەلىستى جەڭەدى.
بىرنەشە ساعات تىڭداعان باياۋ ىرعاقتى اۋەن يشەميالىق ءينسۋلتتى ەمدەيدى. ال مۋزىكالىق اسپاپتارمەن ويناۋ اقىل-ەسى دامىماعان بالالارعا وتە پايدالى ەكەنى انىقتالعان.
مۋزىكا جۇرەك دەرتىنە دە داۋا ەكەن. قان قىسىمىن تومەندەتىپ، جۇرەك ءدۇرسىلىن رەتتەيدى. سونداي- اق، وپەرا دا جۇرەك اۋرۋىنان ەمدەيدى. كانادالىق عالىمدار مۋزىكانىڭ شالا تۋىلعان بالالاردىڭ دامۋىنا وڭ اسەرى بارىن انىقتاعان. اۋەن ولاردىڭ اۋرۋىن جەڭىلدەتىپ، تىنىس الۋىن قالپىنا كەلتىرەدى جانە جۇرەك قىزمەتىن جاقسارتاتىن كورىنەدى. ەگەر بالاڭىزدا جۇرەك اقاۋى بولسا، ونىڭ بولمەسىنەن ۇنەمى باياۋ ىرعاقتى اۋەن نەمەسە كۇيدىڭ دىبىسى ەستىلىپ تۇرعانى ءجون.
مۋزىكا تىڭداۋ كىمدەرگە زيان؟
بۇگىندە قۇلاققاپ كيگەن جاستاردى دا، ورتا جاستاعىلاردى دا كوپتەپ كەزدەستىرۋگە بولادى. ولاردىڭ كەيبىرەۋلەرى ءتىپتى تاماق جەگەن كەزدە دە قۇلاققاپپەن وتىرۋدى ادەتكە اينالدىرعان. زەرتتەۋشى عالىمدار 1,5 ساعاتتان ارتىق ۋاقىت تاققان قۇلاققاپ قۇلاق اۋرۋىنا شالدىقتىرادى دەيدى. اۋەندى تىم جوعارى قويىپ تىڭدايتىنداردىڭ قۇلاعى ەرتە اۋرۋعا شالدىعادى.
دارىگەرلەر مەن پسيحولوگتار باس قوسىپ، قايسى مۋزىكانىڭ ادام دەنساۋلىعىنا پايدالى ءارى زياندى ەكەنىن دالەلدەگەن. باس قوسۋدىڭ ناتيجەسىندە حاۋس، حيپ-حوپ، پانك-روك، اۋىر روك، حەۆيمەتال، شانسون سىندى مۋزىكالار ادام دەنساۋلىعى ءۇشىن زياندى دەپ تانىلسا، كلاسسيكالىق مۋزىكالار كەرىسىنشە ءسىزدىڭ جانىڭىزدى جادىراتىپ، ەرەكشە سەزىمتالدىق پەن ومىرگە دەگەن قۇلشىنىس سىيلايدى. سول سەبەپتى دە اۋەندى تاڭداۋدا قاتەلەسپەۋىمىز كەرەك. بويىڭىزداعى ءتۇرلى دەرتتەردەن ساۋىققىڭىز كەلسە كلاسسيكالىق مۋزىكالاردى تىڭداڭىز. بۇل وتە پايدالى.