جاسىرىن بەينەكامەرانىڭ ارتىقشىلىقتارى
يننوۆاتسيالىق زاماننىڭ باستى جەمىستەرىنىڭ ءبىرى - بەينەباقىلاۋ جۇيەسى، وسى ماسەلەنى شەشۋدە ايتارلىقتاي ءرول اتقارىپ كەلەدى. كەز-كەلگەن «جاۋاپتى» مەكەمەنىڭ ءار بۇرىشىندا جانە ساۋدا ۇيلەرىندە، مەتروپوليتەن سياقتى ادامداردىڭ تولاسسىز كوپ جۇرەتىن ورىنداردا، قاۋىپسىزدىك جۇيەسىنىڭ كەپىلى رەتىندە - بەينەباقىلاۋ كامەرالارى ورناتىلادى. ونى كورىپ ءجۇرمىز، ادەتتەگى كورىنىس. دەسەك تە، بەينەكامەرالاردىڭ «جاسىرىن» ءتۇرىن ورناتاتىنداردىڭ دا قاتارى كوبەيىپ كەلەدى. ونىڭ بىرنەشە سەبەبى بار.
ەڭ الدىمەن جاسىرىن بەينەكامەرا - اتى ايتىپ تۇرعانداي، سىرت كوزگە كورىنبەي تۇسىرۋىندە، ياعني «ۇرلىقشىنى قولعا ءتۇسىرۋ مۇمكىندىگى جوعارى بولادى» دەگەندەي قاۋىپسىزدىك ساپاسىن اناعۇرلىم ارتتىرادى. ۇرلىققا ءتۇسىپ جاتقان ادام - «نازار اۋدارىڭىز، بەينەباقىلاۋ جۇرگىزىلەدى!» دەگەن اقپاراتتىق تاڭبانى كورگەندە، ءوزىن ەركىن ۇستاي المايتىنى انىق. ال جان-جاعىن كوزبەن ءسۇزىپ ءوتىپ، بەينەكامەرانى تاپپاعانى، ءتىپتى ويىنان قايتارىپ جىبەرۋى دە مۇمكىن. سونىمەن قاتار، جاسىرىن بەينەكامەرالار تەك قانا ۆيزۋالدى ۆيدەو جازۋمەن ەمەس، اۋديوفورماتتاعى جازبانى دا جۇرگىزەدى. بۇل باسىمدىق اسىرەسە ۇيدەگى بالا تاربيەلەۋشىلەردىڭ جۇمىسىنا جاسىرىن باقىلاۋ جۇرگىزۋگە كوپ سەپتىگىن تيگىزەدى دەيدى ينتەرنەت-فورۋمدا پىكىر بىلدىرۋشىلەر.
زامان اعىمىنا قاراي، جاسىرىن بەينەكامەرالار پورتاتيۆتىك تيپتەرگە اۋىسۋدا. ياعني، تىكەلەي توق كوزىنەن قۋات الماي، ادام ساۋساعىنان كىشى بولاتىن قۋاتتاعىش باتارەيالاردىڭ كومەگىمەن تاۋلىكتەپ جۇمىس ىستەي الادى. ولاردى كولەمىنە قاراي ءۇيدىڭ، اۋلانىڭ، ساۋدا ورىندارىنىڭ كەز-كەلگەن ادام كورمەيتىن جەرىنە ورنالاستىرۋعا بولادى. زاماناۋي بەينەباقىلاۋ كامەرالارىندا قوزعالىس، دىبىس سەزبەكتەرى قۇرىلعىنىڭ نەگىزگى باسىمدىقتارىنىڭ ءبىرى. كامەرانىڭ باقىلاۋ زوناسىندا ەشقانداي دىبىس، قوزعالىس بولماسا ول ەشتەڭەنى جازبايدى، سايكەسىنشە قۇرىلعىنىڭ جادى تەك كەرەك اقپاراتپەن تولاتىن بولادى.
قازاقستان نارىعىنا جاسىرىن بەينەباقىلاۋ كامەرالارى 2000 -جىلداردىڭ باسىندا كەلدى. باعاسى ساپاسى مەن برەندتىك تيپاجىنا قاراي 6000 تەڭگەدەن باستاپ 1 ميلليون تەڭگەنىڭ اراسىندا.