تولەبي اۋدانىندا شوكولاد ءوندىرىسى قولعا الىنعان

تۇركىستان. قازاقپارات - تۇركىستان وبلىسىنىڭ اكىمى ءومىرزاق شوكەيەۆ جۇمىس ساپارىمەن تولەبي اۋدانىنا باردى. ايماق باسشىسى تاۋلى اۋدانداعى ءبىرىنشى مامىر اۋىلىندا «بالمۇزداق» ج ش س- نىڭ جۇمىسىمەن تانىستى، دەپ حابارلايدى قازاقپارات ءتىلشىسى.

اتالعان كاسىپورىن جىلىنا 3 مىڭ تونناعا جۋىق بالمۇزداق، 15 توننا ءتۇشپارا ءونىمىن شىعارادى. سونداي-اق، سەرىكتەستىكتە وتكەن جىلى جوبالىق قۇنى 800 ميلليون تەڭگەنى قۇرايتىن شوكولادتى گلازۋر جانە شوكولاد وڭدەيتىن سەح ىسكە قوسىلعان. الداعى ۋاقىتتا سەحتا جىلىنا 1100 توننا شوكولادتى گلازۋر مەن شوكولاد ونىمدەرى وندىرىلەتىن بولادى.

بۇدان سوڭ ءوڭىر باسشىسى كيەلىتاس اۋىلدىق وكرۋگىندە ورنالاسقان «گازپرومنەفت-بيتۋم قازاقستان» ج ش س مۇناي ونىمدەرىن وڭدەيتىن زاۋىتتىڭ جۇمىسىن كورىپ، «شىمكەنت قۇس» ج ش س قۇس ەتىن وندىرەتىن سەحىنىڭ جاڭا قۇرىلىس جۇمىستارىمەن تانىستى. 2019-جىلدىڭ قازان ايىندا ىسكە قوسىلاتىن جوباعا 896 ميلليون تەڭگە ينۆەستيتسيا تارتىلعان. مۇندا جىلىنا 2500 توننا قۇس ەتىن ءوندىرۋ جوسپارلانعان. ءومىرزاق شوكەيەۆ اۋدان باسشىسىنا قۇس ەتىن ءوندىرۋدى ارتتىرىپ، كاسىپكەرلەرگە قاجەتتى جەر تەلىمدەرىن ءبولۋدى تاپسىردى.

ايماق باسشىسى ساپارى بارىسىندا سونداي-اق، «قازىعۇرت باقتارى» اۋىل شارۋاشىلىق وندىرىستىك كوپپەراتيۆىندە دە بولدى. ەگىس القابىندا بۇگىنگى تاڭدا 265000 كوشەت وتىرعىزىلعان. 140 گەكتار اۋماقتىڭ 110 گەكتارى الما باۋ، ال قالعان 28 گەكتاردىڭ قۇرىلىسى جۇرگىزىلۋدە. باعبانداردىڭ سوزىنشە، كوشەتتەردىڭ بارلىعى يتاليادان اكەلىنگەن. سونىڭ ىشىندە گرەنين سيت سورتى - 50 مىڭ، ايدارەد - 50 مىڭ، گولدەن دەليشەس - 115 مىڭ ءتۇپ بار. سونىمەن بىرگە، گالا سورتىنان 50004 ءتۇپ ەگىلگەن. جالپى ەگىس القابىنا 1 ميلليارد تەڭگە قارجى بولىنگەن.

كووپەراتيۆتە ءومىرزاق ەستاي ۇلى جاۋاپتى سالا باسشىلارىنا قارقىندى باۋ كولەمىن ارتتىرۋ جونىندە تاپسىرما بەردى. مول ءونىم الۋدا تامشىلاپ سۋارۋ ءادىسىنىڭ تيىمدىلىگىن ايتتى.

اۋدانداعى ءوندىرىس ورىندارىن ارالاعان ءوڭىر باسشىسى كاسىپكەرلىكتى دامىتۋ، جۇمىس ورىندارىن اشۋ جونىندە تاپسىرمالار بەرىپ، تۇرعىنداردىڭ ءال-اۋقاتىن جاقسارتاتىن جۇمىستاردى جانداندىرۋدى تاپسىردى.