ەلوردادا ميداعى ىسىكتى الىپ تاستاۋ بويىنشا كۇردەلى وپەراتسيا جاسالدى
ق ر دەنساۋلىق ساقتاۋ مينيسترلىگىنەن ءمالىم ەتكەندەي، وتا اقتوبە قالاسىنىڭ 38 جاستاعى تۇرعىنىنا جاسالعان. ناۋقاس ۇلتتىق نەيروحيرۋرگيا ورتالىعىنىڭ ورتالىق جۇيكە جۇيەسى پاتولوگياسى بولىمشەسىنە جۇگىنگەن. ورتالىققا جاتقىزىلۋ كەزىندە ەر ادامنىڭ باسى قاتتى اۋىرىپ، اينالعان، ەستە ساقتاۋ قابىلەتى بۇزىلىپ، جالپى السىزدىك جاعدايىندا بولعان. تەكسەرۋدەن كەيىن وعان وپەراتسيالىق ەمدەۋ ۇسىنىلدى.
ناتيجەسىندە دارىگەرلەر ميداعى ىسىكتى الىپ تاستاۋ بويىنشا بىرەگەي وپەراتسيا جاسادى.
«سونداي- اق، وپەراتسيا كەزىندە نەيروناۆيگاتسيا قولدانىلدى، ول ىسىكتىڭ شەگى مەن ورنالاسۋىن انىقتايدى، سەبەبى ىسىك پەن ميدىڭ شەكاراسى ءارقاشان انىق بولا بەرمەيدى. وپەراتسيا ءساتتى ءوتتى. پاتسيەنت ءوزىن جايلى سەزىنۋدە جانە جاقىن ارادا شىعارىلۋعا دايىندالۋدا. وپەراتسيانى 20 جىلدان استام پراكتيكالىق تاجىريبەسى بار، ءوز سالاسىنىڭ ماماندارى جاسادى، اتاپ ايتساق: نەيروحيرۋرگ دارىگەر، ورتالىق جۇيكە جۇيەسى پاتولوگياسى بولىمشەسىنىڭ مەڭگەرۋشىسى، مەديتسينا عىلىمدارىنىڭ كانديداتى - نۇرجان امىربەك ۇلى رىسكەلديەۆ جانە نەيروحيرۋرگ دارىگەر مۇراتبەك ءابدىعالي ۇلى تىلەۋبەرگەنوۆ.
ۇلتتىق نەيروحيرۋرگيا ورتالىعىندا كۇن سايىن كۇردەلىلىك دەڭگەيى ءارتۇرلى 20-25 وپەراتسيا جاسالادى.
«شىندىعىندا، بۇل وپەراتسيالاردىڭ بارلىعى بىرەگەي جانە ءبىز وتاندىق مەديتسيناداعى سەرپىندى ءىس- قيمىلدى ماقتان تۇتۋىمىز قاجەت، سەبەبى ەندى بىزگە كورشىلەس ەلدەردەن ەم الۋعا كەلۋدە»، - دەدى ۆەدومستۆودان.