تەرىنى ادەمى ەتەتىن قاراپايىم ادىستەر

 نۇر-سۇلتان. قازاقپارات - تەرىنىڭ سۇلۋلىعىن ساقتاۋ ەڭ ءبىرىنشى كەزەكتە ءسىزدىڭ باعالى ۋاقىتىڭىزدى قاجەت ەتەدى.

تەرى كۇتىمىنە ۋاقىت بولسەڭىز، ناتيجەسى ۇزاق كۇتتىرمەيدى. تەرى سۇلۋلىعىن ساقتاۋعا كومەكتەسەتىن بىرنەشە ادىستەردى ۇسىنامىز.

سۋىق سۋ

سۋ -  جاستىعىڭىز بەن ساۋلىعىڭىزدىڭ كەپىلى. اسىرەسە، تەرىگە سۋىق سۋ باعالى.

ول تەرىگە تيگەندە قان اينالىمىنىڭ قارقىنىن ارتتىرىپ، ءىسىنۋدى كەتىرەدى جانە تونۋس بەرەدى. سونىمەن قاتار، ۇيىقتار الدىندا 1 ستاقان ليمون قوسىلعان سۋ ىشسەڭىز، كەلەسى كۇنى تەرىڭىزدىڭ ىلعالداندىرىلعانىن بايقايسىز.

تاڭەرتەڭ دە ليمون قوسىلعان سۋ ارتىق ەتپەيدى. ول زات الماسۋدى جاقسارتادى جانە تەرى جاعدايىن ءبىر قالىپتا ۇستاپ تۇرادى.

كوپفۋنكسيالى كوسمەتيكا

كوپتەگەن كوسمەتيكا شىعارۋشى كومپانيالار زاماناۋي ايەلدەردىڭ ءومىر ءسۇرى داعدىلارىن ەسكەرە وتىرىپ بويانۋ ۇدەرىسىن تەزدەتەتىن قۇرالدار شىعارىپ كەلەدى.

مىسالى، قازىر بەتكە دە، ەرىنگە دە پايدالانۋعا بولاتىن ءبىر دالاپ سەكىلدى بوياۋ تۇرلەرىن ۇسىنۋدا. سوندىقتان ۋاقىت ۇنەمدەۋ ءۇشىن وسىنداي كوسمەتيكا تۇرلەرىن الىپ جۇرگەن ءجون. سپورت

سىمباتتى سىرتقى كەلبەتتى ساقتاۋ ءۇشىن قاراپايىم جاتتىعۋلار، يوگا نەمەسە كارديو جاساۋ جەتكىلىكتى. جاتتىعۋ جاساۋ ۋاقىت العانىمەن، ناتيجەسى بىردەن كورىنەدى. تونالدى كرەمدەر تەرىدەگى كەي كەمشىلىكتەردى جاسىرادى، ءبىراق ولارمەن كۇرەسپەيدى.

ال سپورت ولاردىڭ الدىن الادى جانە جويۋعا ىقپال ەتەدى.

تەرى ماسساجى

ۋاقىتىلى ماسساج جاساۋ تەرى جاسۋشالارىنا كوبىرەك وتتەك جەتكىزۋگە كومەكتەسەدى. كوللاگەننىڭ ءوندىرىلۋى كوبەيەدى، سونىمەن بىرگە تەرى رەڭى دە جاقسارادى. ماسساج كەزىندە سۇيىكتى ىلعالداندىرۋشى قۇرالىڭىزدى جاقساڭىز، ءتىپتى جاقسى بولادى. ساۋنا ساۋنادا بۋدا وتىرۋ تەرىدەگى تەرەڭدە جاتقان توكسيندەردىڭ تولىقتاي شىعۋىنا كومەكتەسەدى.

دۇرىس ۇيقى

دۇرىس ۇيىقتاۋ تەرىنىڭ سۇلۋلىعىنا ىقپال ەتەدى. قالىپتاسقان 8 ساعاتتىق ۇيقىدان باسقا تاعى بىرنەشە ەرەجە بار. جىبەك نەمەسە اتلاس جاستىقتا ۇيىقتاڭىز. ۇيىقتاردا شاشىڭىزدى قاتتى تارتپاي ءورىپ جاتىڭىز نەمەسە بوس ەتىپ بۋىپ قويىڭىز. سەبەبى شاشتا دا باكتەريالار مەن توزاڭ بولادى، ولار ۇيقى كەزىندە تەرىگە ءوتىپ، بەزەۋدىڭ پايدا بولۋىنا ىقپال ەتۋى مۇمكىن.