ەلوردا اتاۋىن نۇر-سۇلتان دەپ وزگەرتۋ ءۇشىن قانشا قارجى كەتەدى؟
«جاقىندا ەلوردامىزدىڭ اتىن نۇر-سۇلتان قالاسى دەپ وزگەرتۋ تۋرالى زاڭعا قول قويىلدى. وسىعان بايلانىستى رەسپۋبليكالىق نەمەسە جەرگىلىكتى بيۋجەتتەن قوسىمشا اقشا قاراستىرىلمايدى»، - دەدى سمايىلوۆ.
نۇر-سۇلتان قالاسىندا ورنالاسقان ورتالىق مەملەكەتتىك ورگانداردىڭ عيماراتىنداعى ماڭدايشا جازۋدى اۋىستىرۋ جىل سايىنعى قارجىلاندىرۋ اياسىندا جۇزەگە اسادى.
مەملەكەتتىك مەكەمەلەر ەلەكتروندى قۇجات اينالىمىنا اۋىسقاندىقتان، ءارتۇرلى بلانكتەردى الماستىرۋ تالاپ ەتىلمەيدى.
«ەلوردامىزداعى جەرگىلىكتى اتقارۋشى ورگاندارىنىڭ بلانكتەرىن، يندەكستەرىن جانە نىساندارىن ءوندىرۋ - جەرگىلىكتى بيۋجەتتىڭ ەسەبىنەن، وتكەن جىلدىڭ جانە اعىمداعى كەزەڭنىڭ قورىتىندىلارى بويىنشا جەرگىلىكتى بيۋجەتتىڭ ورىندالۋ بارىسىن ەسكەرە وتىرىپ جۇرگىزىلەدى.
مەن كەشە قالا اكىمىمەن سويلەستىم. ول جەرگىلىكتى بيۋجەتتە جالپى قۇنى 40 ميللون تەڭگە قالانىڭ ەسكىرگەن بەلگىلەرى مەن ماڭدايشالارىن اۋىستىرۋ ءۇشىن قاراستىرىلعانىن ايتتى.
ياعني، بۇل اعىمداعى شىعىندار بولىپ تابىلادى. سونىڭ اياسىندا وسى بەلگىلەر مەن ماڭدايشالاردى بىرتىندەپ وزگەرتۋدى جوسپارلاپ وتىرمىز. ولار قالانىڭ كىرە بەرىسىندە ورنالاسقان باستى ورىنداردان باستالادى، سودان كەيىن بىرتىندەپ باسقا دا قاجەتتى جەرلەرگە اۋىستىرادى.
قوسىمشا قاراجات ءبولۋ جوسپاردا جوق. ءبارى اعىمداعى بيۋجەت اياسىندا جۇزەگە اسىرىلادى»، - دەدى سمايىلوۆ.