قاسىم- جومارت توقايەۆ تۋرالى ماڭىزدى جەتى مالىمەت
وسى ورايدا Kaktakto جاڭا پرەزيدەنتتىڭ ءومىربايانىن زەرتتەپ، ماڭىزدى دەگەن جەتى فاكتى تۋرالى اڭگىمەلەپ بەرۋدى ۇيعارىپتى.
№.1. قاسىم- جومارت توقايەۆ زيالىلار وتباسىندا دۇنيەگە كەلگەن. اكەسى - كەمەل توقايەۆ - قازاقستانداعى دەتەكتيۆتىك جانردىڭ نەگىزىن قالاعان، بەلگىلى قازاق جازۋشىسى. «2- دارەجەلى ۇلى وتان سوعىسى وردەنى» جانە قوس «باتىلدىعى ءۇشىن» مەدالىن وڭىرىنە تاققان مايدانگەر. اناسى - شاباربايەۆا تۇرار - پەداگوگيكالىق جوعارى وقۋ ورنىنىڭ وقىتۋشىسى، حالىقارالىق- لينگۆيست.
№2. قاسىم- جومارت توقايەۆتىڭ اكەسى وتىزىنشى جىلدارى الاپات اشتىقتان جان ساقتاۋ ءۇشىن وتباسىمەن فرۋنزە قالاسىنا اۋادى. وسىنداعى ءبىر اۋقاتتى ادامنىڭ قول استىنا جۇمىسقا جالدانادى. كۇتپەگەن جاعدايدا باستارىنا قايعى جامالادى. كەمەل توقايەۆتىڭ اناسىنىڭ اياق- قولى جانسىزدانىپ، دەرتكە شالدىعادى. ءبىر كۇنى وتاعاسى جۇمىسقا كەتىپ، قاسىم مەن كەمەل دە بازار ماڭىندا جۇرگەندە، جانىپ تۇرعان وشاققا ۇيدە ويناپ جۇرگەن ءۇش جاسار كىشكەنتاي قىز قۇلاپ تۇسەدى. تاماق جاسايتىن وشاقتا، تىرىدەي جانىپ جاتقان بالاسىنا، سال بوپ جاتقان اناسى قول ۇشىن بەرە المايدى.
وتاعاسى ۇيىنە ورالعاندا جان تۇرشىگەرلىك سۇمدىق كورىنىسكە كۋا بولادى. وتقا جانعان كەنجە قىزى مەن جۇزىندە ادام شوشىر ازاپتىڭ ءىزى قالعان جانسىز جۇبايى جاتىر ەدى.
ءبىر اينالدىرسا شىر اينالدىرادى دەگەندەي، بازاردان قايتىپ كەلە جاتقان كەمەل مەن قاسىمدى تەنتىرەپ جۇرگەن جەتىمدەردىڭ بىرىنە ساناپ، ءتارتىپ ساقشىلارى ۇستاپ اكەتەدى. اكەلەرى توسا- توسا ءتوزىمى تاۋسىلادى. اقىرى ولاردى الدەكىمدەر ۇرلاپ اكەتكەن شىعار دەپ پايىمدايدى. بۇل جىعىلعانعا جۇدىرىق بولىپ، بارىنەن تۇلداي ايىرىلعان وتاعاسىنىڭ ءوزى كوز كورمەس ءبىر جاققا ءسىڭىپ، جوق بولادى. سونىمەن كەمەل مەن قاسىم فرۋنزەدەگى جەتىمدەر ۇيىنەن ءبىر- اق شىعادى.
№3. پرەزيدەنتتىڭ اكەسىن يليزاروۆ اپپاراتىن جاساۋشى امان ساقتاپ قالدى. مايداندا جاراقات العان كەمەل توقايەۆتىڭ اياقتارىن كەسۋ قاۋپى تۋادى. بۇل دەگەنىڭىز تۇككە جارامايتىن مۇگەدەكتىك. ونىڭ باقىتىنا وراي، وسى اسكەري گوسپيتالدە، جاس بولسا دا تانىمال بولعان - گاۆرييل يليزاروۆ دەگەن ورتوپەد- دارىگەر بار ەدى. كەمەل توقايەۆتى ەمدەۋدى سول ءوز قولىنا الىپ، اقىرى اياعىنا تۇرعىزادى.
№4. مەكتەپ جاسىنداعى جىلدارى. قاسىم- جومارت توقايەۆ الماتى №25 مەكتەپ- گيمنازيا تۇلەگى. بۇل ەلۋ جىلدان استام ۋاقىت فرانسۋز ءتىلىن تەرەڭدەتە وقىتىپ كەلە جاتقان بىردەن ءبىر ءبىلىم وشاعى.
№5. قاسىم- جومارت توقايەۆ ساياساتتان سىرت، جازۋشىلىقپەن دە شۇعىلدانادى. اكە قانىنان دارىعان قاسيەت بولۋى كەرەك. اكەسى كوبىنە دەتەكتيۆ جانرىنا دەن بەرسە، بالاسى مەمۋار جازۋعا اۋەستىك تانىتتى. جاي انشەيىن ءومىرنامالىق بايانداۋ ەمەس، تاۋەلسىز قازاقستاننىڭ ديپلوماتياسىنىڭ قالىپتاسۋى مەن قىر- سىرلارىن اشاتىن قۇندى دۇنيەلەردەن تۇرادى. 2003 -جىلى العاشقى جانە نەشە مارتە قايتا باسىلىپ شىققان «پرەودولەنيە» وچەركتەر جيناعى ەدى. بۇدان بەس جىل وتكەن سوڭ، «سۆەت ي تەن» كىتابى جارىق كوردى. س ءى م- نە ەكىنشى رەت كەلۋى كەزەڭىن سۋرەتتەيدى. سونداي- اق، 2004 -جىلى توقايەۆتىڭ جالپى رەداكسيالاۋىمەن قازاقستان ديپلوماتيالىق قىزمەتىنە ارنالعان وقۋ قۇرالى جارىق كوردى.
№6. كاسىپكەر ۇلى بار. قاسىم- جومارت توقايەۆتىڭ تىكەلەي ءوزى تۋرالى مالىمەت جۇتاڭ. شاڭىراق كوتەرگەن. جۇبايى - نادەجدا داۆىدوۆنا - قايىرىمدىلىقپەن شۇعىلدانادى. ۇلى، تيمۋر، 1984 -جىلى تۋعان. «دابي پەتروليۋم كومپاني» مۇناي كومپانياسىنىڭ بىرلەسكەن يەگەرى. اتىراۋ وبلىسى، ماحامبەت اۋدانىنداعى «گريادوۆوە» كەن ورنىنان مۇناي وندىرەدى.
№7. قاسىم- جومارت توقايەۆ سالاۋاتتى ءومىر سالتىن قادىرلەيدى. سپورتپەن اينالىسادى. بالا كەزىنەن پينگ- پونگ ويناۋعا قۇمار. ون ءۇش جىل بويى ول قازاقستان ستول تەننيسى فەدەراتسياسىن باسقاردى.
ساياساتكەر شۋلى باسقوسۋلاردى ۇناتپايدى. قولى بوس كەزدەرى اسىقپاي جاياۋ قىدىرعاندى جانە كىتاپ وقىعاندى قالايدى.
ىقشامداپ اۋدارعان ز. سامالبەك ۇلى