نۇر-سۇلتاندا وتكەن مەرەكەلىك اكسياعا جۇزدەگەن ادام قاتىستى
مەرەكەلىك شاراعا شىعارماشىلىعى قازاقستان استاناسىنىڭ دامۋ تاريحىمەن تىعىز بايلانىستى جاس ارتىستەر قاتىستى. ەسترادا ارتىستەرى، اسپاپتىق جوبالار مەن ءبي ۇجىمدارى قالانى قايتا اتاۋعا قولداۋ تانىتتى. قالالىق الاڭدا قوعام، مادەنيەت، سپورت سياقتى سالالاردىڭ وكىلدەرى، ستۋدەنتتەر، ەلوردا تۇرعىندارى مەن قوناقتارى جينالدى.
ۇيىمداستىرۋشىلاردىڭ مالىمەتىنشە اكسياعا 800 گە تارتا ادام قاتىسقان. ساحنادا اعايىندى جۇگىنىسوۆتەر، دوس، «Gentlemen» توبى، «Qaz Made» ينسترۋمەنتالدى تريوسى، «Di-Art Style»، «راحات لۋكۋم»، «شوكولاد» توپتارى، اقتوتى بولىشيەۆا جانە اينۇر ابديەۆا ونەر كورسەتتى. كەلۋشىلەردى ءوزىنىڭ الەمدىك رەكوردىن ەلوردانىڭ 20 جىلدىعىنا ارناعان قازاقستاندىق پالۋان سەرگەي تسىرۋلنيكوۆ تا قۋانتتى. 2018-جىلدىڭ شىلدەسىندە سەرگەي سالماعى 37 توننا بولاتىن تەپلوۆوزدى 20 مەترگە سۇيرەگەن-ءدى. بۇگىن ول كورەرمەندەرگە تاعى دا بىرنەشە جاتتىعۋدى كورسەتتى.
«نۇرسۇلتان ءابىش ۇلى ەلوردانىڭ ونىڭ ەسىمىمەن اتالۋىنا لايىق. جاڭا اتاۋعا ۇيرەنۋ استانالىقتار ءۇشىن قيىن. ءبىرشاما ۋاقىت وتكەن سوڭ، ءبارى دە رەتتەلەدى دەپ ويلايمىن»، - دەيدى س. تسىرۋلنيكوۆ.
ەلوردا اتاۋىن وزگەرتۋگە وراي شىعارماشىلىق زيالى قاۋىم، قازاقستان حالقى اسسامبلەياسىنىڭ وكىلدەرى، جاستار ۇيىمدارىنىڭ كوشباسشىلارى، سپورت چەمپيوندارى قولداۋ ءبىلدىردى.
«بۇگىن ءبىز ەلوردانى نۇر-سۇلتان دەپ وزگەرتۋ باستاماسىن قولداۋ ءۇشىن جينالدىق. مەن بۇنى ۇلت كوشباسشىسىنىڭ وتىز جىلدىق ەڭبەگىنىڭ مويىندالۋى دەپ بىلەمىن. مەن ءبىزدىڭ كوپ بولعانىمىزدى قالايمىن»، - دەيدى قازاق تەحنولوگيا جانە بيزنەس ۋنيۆەرسيتەتىنىڭ ستۋدەنتى، «استانا ارۋى-2018» بايقاۋىنىڭ جەڭىمپازى ەركەناز سەيفۋللا.
«مەن تۇڭعىش پرەزيدەنتىمىزدى قولدايمىن دا، قۇرمەتتەيمىن دە. مەن حالىقارالىق ارەنادا قازاقستاننىڭ نامىسىن قورعايمىن. نۇر-سۇلتان استانا اتاۋىنا قاراعاندا كوڭىلگە قونىمدى سياقتى. سپورتشىلار جاڭا اتاۋدى قولدايدى. ءبىزدىڭ تۇڭعىش پرەزيدەنتىمىز سوعان لايىق»، - دەيدى بوكستان قازاقستاننىڭ ەڭبەك سىڭىرگەن سپورت شەبەرى، 2012-جىلى لوندوندا وتكەن وليمپيادانىڭ قولا جۇلدەگەرى مارينا ۆولنوۆا.
«بارشا استانالىقتاردى ناۋرىز مەيرامىمەن قۇتتىقتايمىن! قالا ەندى نۇر-سۇلتان دەپ اتالاتىن بولدى. مەنىڭشە، ونىڭ ناعىز اتاۋى - وسى. نۇر-سۇلتان اتاۋىندا «قالالاردىڭ سۇلتانى»، «شۋاقتى» دەگەن ماعىنا جاتىر. «نۇر-سۇلتان» اتاۋىنىڭ ءوزى دە ەرەكشە ەستىلەدى. بىرىنشىدەن، بۇعان ءبىزدىڭ تۇڭعىش پرەزيدەنتىمىز، ەلباسى نۇرسۇلتان ءابىش ۇلى نازاربايەۆ لايىق. ول وسى قالانىڭ جانە رەسپۋبليكامىزدىڭ دامۋىنا ەڭبەك ءسىڭىردى»، - دەدى م. گوركي اتىنداعى مەملەكەتتىك اكادەميالىق ورىس دراما تەاترىنىڭ ديرەكتورى ەركىن قاسەنوۆ.