قازاقستاندا «بالا داۋىسى» بايقاۋى باستالادى

None
None
الماتى. قازاقپارات - 29- ناۋرىز كۇنى قازاقستاندا جىل سايىنعى ءداستۇرلى «بالا داۋىسى» بايقاۋى باستالادى، دەپ حابارلايدى قازاقپارات بايقاۋ ۇيىمداستىرۋشىلارىنا سىلتەمە جاساپ.

ءاليا نازاربايەۆانىڭ «جاندانۋ الەمى» قورىنىڭ بىرەگەي جوباسى - ۇلتتىق «بالا داۋىسى» بالالار ءان بايقاۋىنىڭ ءتورتىنشى ماۋسىمى باستالادى. ەلىمىزدەگى ەڭ اۋقىمدى بالالار ءان بايقاۋى وسى جىلى قازاقستان رەسپۋبليكاسىنىڭ تۇڭعىش پرەزيدەنتى - ەلباسى قورى جانە قازاقستان رەسپۋبليكاسىنىڭ مادەنيەت جانە سپورت مينيسترلىگىنىڭ قولداۋىمەن وتەدى.

«بايقاۋدىڭ نەگىزگى ماقساتى - مۋزىكالىق جانە شىعارماشىلىق دارىنى بار بالالاردى انىقتاۋ جانە ولارعا قولداۋ كورسەتۋ، ولاردىڭ شىعارماشىلىق الەۋەتىن جۇزەگە اسىرۋعا جانە بولاشاقتا ولاردىڭ قابىلەتتەرىن دامىتۋعا كومەكتەسۋ. بايقاۋدىڭ ءبىرىنشى ماۋسىمىنان باستاپ بالاباقشا مەن مەكتەپتەرگە سىيلاعان 56 جاڭا ءان جازىلدى؛ ىرىكتەۋ كەزەڭدەرىنە 20156 بالا قاتىسىپ، تەلەۆيزيالىق ەفيرلەردە 12 كونسەرتتىك شوۋ، 24 كۇندەلىك، 128 بەينەروليك كورسەتىلدى. «بالا داۋىسىنىڭ» كوپتەگەن تۇلەكتەرى قازىرگى تاڭدا «جاندانۋ الەمى» قورىنىڭ قولداۋىمەن مۋزىكالىق مەكتەپتەر مەن كوللەدجدەرىندە ءتالىم الۋدا. بايقاۋدىڭ ىرىكتەۋ كەزەڭدەرىنىڭ ەلىمىزدىڭ بارلىق وڭىرلەرىندە ءوتۋى - «بالا داۋىسىنىڭ» بىرەگەيلىگى» دەلىنگەن حابارلامادا.

بيىل «بالا داۋىسى» بايقاۋى جاڭا فورماتتا وتەدى. 29- ناۋرىز بەن 22- مامىر ارالىعىندا شىعارماشىلىق توپ 8 جانە 12 جاس ارالىعىنداعى ناعىز تالانتتاردى تاڭدايدى. 17 ەڭ ۇزدىك بالالار داۋىسى عانا بايقاۋدىڭ سۋپەر فينالىنا جولداما الادى. ەلىمىزدىڭ بارلىق وبلىس ورتالىقتارى مەن شىمكەنت، الماتى، نۇر-سۇلتان قالالارىندا بۇلدىرشىندەردى ءادىل-قازى قۇرامىنا كىرەتىن قازاق ەستراداسىنىڭ ايگىلى جۇلدىزدارى، تانىمال پروديۋسەرلەر مەن حورەگرافتار كۇتەدى. ىرىكتەۋگە كەلگەن ءاربىر بالا ەستەلىك سىيلىقتار مەن ديپلومدارعا يە بولىپ، بايقاۋدىڭ كۇندەلىكتەرى تۇسىرىلىمىنە قاتىسادى. بالالاردىڭ اتا-انالارى مەن تالىمگەرلەرى دە شەتتە قالمايدى، ولاردىڭ قالاۋىمەن بالدىرعانداردىڭ شىعارماشىلىعىن دامىتۋ بويىنشا ماستەر-كلاستار جانە بالا پسيحولوگياسى ماسەلەلەرى بويىنشا كونسۋلتاتسيا وتكىزىلەدى.

كۇزدە ەلىمىزدىڭ ۇزدىك 17 داۋىسى «جۇلدىزدى ارمان ۇيىندە»، الاتاۋ تاۋلارىنىڭ باۋرايىندا ورنالاسقان «بوبەك» ۇلتتىق ورتالىعىندا باس قوسادى. كۇندەلىكتى، كاسىبي مۋزىكانتتار، حورەوگرافتار، ستيليستەر بالالاردى سۋپەر-فينالدىڭ تەلەۆيزيالىق تۇسىرىلىمدەرىنە دايىندايدى.

24-26- قازان ارالىعىندا الماتى قالاسىنىڭ «رەسپۋبليكا سارايىندا» وتەتىن بايقاۋدىڭ سۋپەر-فينالىندا بايقاۋ اياسىندا جازىلعان جاڭا اندەر شىرقالىپ، «بالالىق شاقتىڭ مەيىرىمدى عالامشارى» اتتى سپەكتاكل-ميۋزيكلدىڭ تۇساۋكەسەرى وتەدى. كورەرمەندەر فيناليستەردىڭ قاتىسۋىمەن وتەتىن قايتالانباس شوۋدىڭ كۋاگەرى بولا الادى. بايقاۋدىڭ بارلىق اقتىق كەزەڭدەرىن كاسىبي قازىلار القاسى جانە ونلاين-داۋىس بەرۋ ارقىلى تەلەكورەرمەندەر باعالايدى.

بارلىق فيناليستەر ارنايى سىيلىقپەن ماراپاتتالىپ، ال، ەڭ ۇزدىك دەپ تانىلعان بالا داۋىسى ەلىمىزدىڭ تاڭداۋلى مۋزىكالىق ءبىلىم ورداسىندا وقۋعا گرانت جانە ەرتەگى الەمى - ديسنەيلەندكە جولداما الادى.

ايتا كەتەيىك، ەڭ العاشقى ىرىكتەۋ 29- ناۋرىز كۇنى الماتىداعى وقۋشىلار سارايىندا وتەدى.

سوڭعى جاڭالىقتار