ابىلايدىڭ اق ۇيىندە حاننىڭ ۇزەڭگىلەسى - تىشقان باتىردىڭ نايزاسىنىڭ ۇشى ساقتالعان

پەتروپاۆل. قازاقپارات - پەتروپاۆلداعى ابىلايحان رەزيدەنتسياسىندا ەرجۇرەك تىشقان باتىردىڭ نايزاسىنىڭ ۇشى ساقتالعان. ونى مۇراجايعا باتىردىڭ ۇرپاعى اكەلىپ تاپسىرعان، دەپ حابارلايدى قازاقپارات ءتىلشىسى.

18 - عاسىردا ءومىر سۇرگەن تىشقان باتىردىڭ شىن اتى - قازىبەك پارمەنبەك ۇلى. حالىق اۋزىندا ول تۋرالى اڭىز اڭگىمەلەر كوپ. سونىڭ ءبىرى اتىنا بايلانىستى.

«باتىر بويى تاپال، قاراتورى كىسى بولعان. ءارى ءبىر ورىندا بايىز تاۋىپ وتىرمايدى ەكەن. سودان جەڭگەلەرى ەركەلەتىپ «تىشقان» اتاپ كەتكەن عوي. كەيىن ءوز ەسىمى ۇمىت بولىپ، تاريحتا تىشقان باتىر بولىپ اتى قالدى»، - دەيدى ۇرپاعى عابيت بەكجانوۆ.

ابىلايحاننىڭ ۇزەڭگىلەسى - تىشقان باتىر ەلدى جوڭعارلاردان قورعاعان ەكەن. ول جايىندا حالىق اراسىندا اۋىزەكى كوپ ايتىلعانىمەن، ەشكىم زەرتتەپ، زەردەلەمەگەن. ەسىمى ۇمىت بولماۋ ءۇشىن ودان قالعان ۇرپاق - عابيت، نۇرجان بەكجانوۆتار كوزدەرىنىڭ قاراشىعىنداي ساقتاپ كەلگەن اتامۇرا - باتىردىڭ نايزاسىنىڭ ۇشىن «ابىلاي حان رەزيدەنسياسى» مۋزەي- كەشەنىنە سىيعا تارتتى.

«جادىگەر 1920-30 -جىلدارى مەنىڭ بەكجان اتامنىڭ ۇيىندە ەسىكتىڭ ۇستىندە سابىمەن ءىلىنىپ تۇرادى ەكەن. ول كەزدە قاسقىر كوپ. اتام جول جۇرگەندە وزىمەن الىپ جۇرگەن. كەيىن حالىق اقىنى احمەتجان نۇرتازين سول نايزانى قالاپ، سۇراپ الادى. ودان ول جادىگەر اڭشى، سال- سەرى قوشان جانتىلەۋوۆ دەگەن ازاماتتا بولادى. قايتىس بولارىندا ول كىسى ايەلىنە «وسى نايزانى مەنىڭ مويىنىما قارىز قىلماي تىشقان باتىردىڭ ۇرپاعىنا بەر» دەپ اماناتتاپ كەتىپتى. 1995 -جىلدارى اتادان قالعان مۇرا ءبىزدىڭ قولىمىزعا ءتيدى»، - دەيدى نۇرجان بەكجانوۆ.

«ابىلاي حاننىڭ رەزيدەنسياسى» مۋزەي- كەشەنى ديرەكتورىنىڭ ورىنباسارى اسەمگۇل قىدبەكوۆانىڭ ايتۋىنشا، نايزانىڭ ۇشى - 24,2، سۇڭگى تەمىردىڭ ديامەترى - 3 س م شاماسىندا. بۇل نايزا جاقىن قاشىقتىقتا، بەتپە- بەت ايقاستا تۇيرەۋ ماقساتىندا قولدانىلاتىن قارۋ تۇرىنە جاتادى.

 باتىردان قالعان مۇرا، قۇندى جادىگەر بۇگىندە مۇراجاي ەكسپوزيتسياسىنىڭ «تاق زالىندا» تۇر.

اۆتور: اقەركە داۋرەنبەك قىزى