ۋاقىت ادام ەسەيگەن سايىن نەلىكتەن جىلدام وتەدى؟ - الەمدىك باسپا سوزگە شولۋ

«قازاقپارات» ح ا ا ادەتتەگىدەي وقىرمان نازارىنا الەمدىك اقپارات كوزدەرىنە شولۋىن ۇسىنادى.

ازيادا اۋانىڭ لاستانۋىنا قارسى كۇرەستى كۇشەيتۋ كەرەك - Daily Mail

بۇكىل ازيا ەلدەرىنىڭ بيلىگى اۋا مەن سۋدىڭ لاستانۋىنا قارسى ءتۇرلى شارالاردى قولعا الىپ جاتىر، ال جەكە كومپانيالار تەك پايدا تابۋدى ويلاۋدا. Daily Mail باسىلىمىنىڭ جازۋىنشا، ازياداعى ميلليونداعان حالىق اۋا لاستانۋىنىڭ زاردابىن تارتۋدا.

 «بيلىك اۋانى تازارتاتىن، سۋدىڭ ساپاسىن ارتتىراتىن قۇرىلعىلاردى پايدالانۋعا تىرىسسا، جەكە كومپانيا وكىلدەرى وكپەنى تازارتاتىن شاي مەن كونسەرۆىلەنگەن اۋا ساتىپ بايۋدى كوزدەپ وتىر»، دەپ جازادى باسىلىم. اۆتوردىڭ ايتۋىنشا، دۇنيەجۇزىلىك دەنساۋلىق ساقتاۋ ۇيىمى اۋانىڭ لاستانۋى ازيا - تىنىق مۇحيتى ەلدەرى حالقىنىڭ 92 پايىزىنا كەرى اسەرىن تيگىزەتىنىن مالىمدەگەن.

 «الەمدەگى ەڭ لاستانعان قالا نيۋ- دەليدىڭ بيلىگى 2017 -جىلى تىكۇشاقپەن قالاعا سۋ سەبۋدى ويلاستىرعان ەدى. ءبىراق قالاداعى تۇتىننەن ەشتەڭە كورىنبەگەندىكتەن، بۇل جوبا جۇزەگە اسپادى»، دەپ جازادى اۆتور. ونىڭ ايتۋىنشا، وڭتۇستىك كورەيا بيلىگى دە اۋا لاستانۋىمەن كۇرەسۋ ءۇشىن جاساندى جاۋىن شاشىن شاقىرۋعا تىرىسىپ كورگەن. ال سولتۇستىك قىتايداعى شيان قالاسىندا وتە ۇلكەن اۋا تازالايتىن قۇرىلعى ورناتىلعان.

 «گونكونگا بيىل اۋا تازالايتىن جۇيەمەن جابدىقتالعان 3,7-كيلومەترلىك تۋننەل اشىلدى. ول اۋانى وڭدەپ شىعاراتىن الەمدەگى ەڭ ۇلكەن تۋننەل سانالادى. ال نيۋ دەلي بىلتىر اۆتوبۋس توبەلەرىنە اۋا تازالايتىن قۇرىلعى ورناتتى. قىتايداعى وتە لاس قالالاردا تۇراتىن حالىق كوبىنە قىس كەزىندە باسقا جاققا كەتىپ قالادى. شاڭحاي مەن بەيجىڭنىڭ ميلليوننان استام تۇرعىندارى جىل سايىن اۋاداعى ءتۇتىن كەسىرىنەن باسقا مەملەكەتتەرگە كەتۋگە ءماجبۇر بولادى»، - دەپ جازادى اۆتور.

 اۆتوردىڭ جازۋىنشا، بۇل پروبلەمانى بايقاعان كاسىپكەرلەر كونسەرۆىلەنگەن اۋا ساتۋعا كوشكەن.

 «كاسىپكەرلەر كانادا، جاڭا زەلانديا مەن اۋستراليا نەمەسە شۆەيتساريانىڭ 8 ليترلىك كونسەرۆىلەنگەن اۋاسىن 22 دوللارعا ساتىپ جاتىر. ال  ۇلى بريتانيا اۋىلىنان اكەلىنگەن اۋا ءتىپتى 125 دوللار تۇرادى. بۇل اۋا لاستانۋعا قارسى كومەكتەسە المايتىنى انىق»، دەپ جازادى اۆتور.

ادام ەسەيگەن سايىن ۋاقىت نەگە جىلدام وتەدى؟ - European Review

«ءبىز ەسەيگەن سايىن ۋاقىت زىرعىپ، جىلدام ءوتىپ جاتادى. عالىمداردىڭ ايتۋىنشا، بۇعان ادام ميىنىڭ قارتايۋى اسەر ەتەدى»، دەپ جازادى European Review باسىلىمى.

 زەرتتەۋشىلەردىڭ ايتۋىنشا، ادام ەسەيگەن سايىن اقپاراتتى وڭدەۋ ءۇشىن مي كوپ ۋاقىتتى قاجەت ەتەدى. ال جاستىق شاقتا مي كەز كەلگەن جاڭا اقپاراتتى جىلدام قابىلدايدى جانە از ۋاقىتتىڭ ىشىندە وڭدەي الادى. سول سەبەپتى ادامعا جاس كەزدە ۋاقىت باياۋ وتەتىندەي كورىنەدى.

«ا ق ش- تاعى ديۋك ۋنيۆەرسيتەتى عالىمدارى جۇيكە جۇيەسى مەن نەيرونداردىڭ ۋاقىتتى قابىلداۋىنا قاتىستى زەرتتەۋ جۇرگىزگەن. زەرتتەۋ اۆتورى ەدريان بەجاننىڭ ايتۋىنشا، ادامدار جاس كەزىندە ۋاقىتىم باياۋ ءوتىپ جاتىر دەپ ويلايدى جانە سول كۇندەر تۋرالى ۇمىتپايدى. بۇل ولاردىڭ سول كەزدەگى سەزىمى مەن قابىلداۋىنىڭ ماڭىزدى بولعانىن بىلدىرمەيدى. بۇل جاس كەزدە اقپاراتتىڭ جىلدام وڭدەلگەنىن جانە قابىلدانعانىن عانا كورسەتەدى»، دەپ جازادى اۆتور.

قىتاي جاساندى ينتەللەكت سالاسىندا امەريكانى باسىپ وزۋى مۇمكىن - Verge

2017 -جىلى قىتاي 2030 -جىلعا دەيىن جاساندى ينتەللەكت سالاسىندا كوشباسشىعا اينالۋعا ارنالعان جوسپارىن تانىستىرعان بولاتىن. Verge باسىلىمىنىڭ جازۋىنشا، قازىردىڭ وزىندە قىتاي بۇل جوسپاردىڭ ورىندالۋىنا ءبىر تابان جاقىن تۇر. اۆتوردىڭ ايتۋىنشا، قىتاي عالىمدارى عىلىمي ماقالا بويىنشا امەريكالىق عالىمداردى باسىپ وزعان.

 «سوڭعى جۇرگىزىلگەن زەرتتەۋلەرگە سەنسەك، قىتاي عالىمدارىنىڭ جاساندى ينتەللەكت تۋرالى جازىلعان عىلىمي ماقالالارى امەريكا زەرتتەۋشىلەرىنەن كوپ. ال ا ق ش جاساندى ينتەللەكت بويىنشا الەمدە ءبىرىنشى ورىندا تۇر. دەگەنمەن، قىتاي ۇكىمەتىنىڭ ءبىلىم مەن وندىرىسكە قۇيعان ينۆەستيتسياسى ءوز جەمىسىن كورسەتە باستادى»، دەپ جازادى اۆتور. دەگەنمەن، سيەتل ينستيتۋتى ماماندارىنىڭ ايتۋىنشا، ماقالا سانىنا عانا ەمەس، ونىڭ سيتاتالانعان دەڭگەيىنە دە ءمان بەرۋ كەرەك.

 «2 ميلليوننان استام ماقالالاردى ساراپتاي كەلە اللەن ينستيتۋتى قىتاي جاساندى ينتەللەك سالاسىندا امەريكانى باسىپ وزاتىنىن ايتتى»، دەپ جازادى باسىلىم.

اۆتور: ايكۇمىس بولاتبەك