ۇكىمەت باسشىسى قورعاستاعى ءبىرقاتار نىساندى ارالادى
پرەمەر- مينيستر الدىمەن پانفيلوۆ اۋدانىندا بولىپ، مەملەكەت باسشىسىنىڭ تاپسىرماسى بويىنشا كوكتەمگى سۋ تاسقىنىنىڭ الدىن الۋ مەسەلەلەرىن پىسىقتادى. بۇدان بولەك، «نۇر جولى» وتكىزۋ پۋنكتىنىڭ، «قورعاس» شەكارا ماڭى ىنتىماقتاستىعى حالىقارالىق ورتالىعىنىڭ جانە «قورعاس - شىعىس قاقپا» ارنايى ەكونوميكالىق ايماعىنىڭ جۇمىسىمەن تانىستى.
ۇكىمەت باسشىسى قورعاس وزەنىندە سالىنىپ جاتقان سەلدەن قورعانىس نىساندارىن ارالاپ، جاعالاۋدى نىعايتۋ جۇمىستارىمەن تانىستى. بۇل ماقساتقا 30 ميلليارد تەڭگە بولىنگەن. قازىر سونىڭ 8,8 ميلليارد تەڭگەسى يگەرىلدى. وعان 5 شاقىرىمداي جاعالاۋ نىعايتىلىپ، باسقۇنشى اۋىلى مەن «دوستىق» گيدروتورابىنا دەيىنگى اۆتوجول جوندەلدى. بۇگىندە جالپى ۇزىندىعى 40 شاقىرىمدىق شۇقىربۇلاق- قازانكول جولى جاسالىپ جاتىر.
قازاقستان مەن قىتاي حالىق رەسپۋبليكاسىنىڭ شەكاراسىنداعى «نۇر جولى» وتكىزۋ پۋنكتى وتكەن جىلى اشىلدى. ول تولىق قۋاتىمەن جۇمىس ىستەي باستاعان كەزدە كۇنىنە 2,5 مىڭ جۇك كولىگىن وتكىزە الادى. بۇل نىسان بولاشاقتا 700-گە جۋىق ادامدى جۇمىسپەن قامتاماسىز ەتىپ، قازىناعا 300 ميلليارد تەڭگەدەن استام ءتۇسىم تۇسىرۋگە مۇمكىندىك بەرەدى.
ءىلياس جايلىبايەۆ، جەكە سەرىكتەس:
- «نۇر جولى» وتكىزۋ پۋنكتى اشىلعان 6 ايدىڭ ىشىندە مەملەكەتتىك بيۋدجەتكە 7 ميلليارد تەڭگە ءتۇسىم ءتۇستى. الداعى ۋاقىتتا بۇل كولەم 3 ەسەگە دەيىن ارتاتىن بولادى. ال «قورعاس - شىعىس قاقپا» ارنايى ەكونوميكالىق ايماعى جوباسىن جۇزەگە اسىرۋعا 77,3 ميلليارد تەڭگە جۇمسالدى. بيزنەس ۇدەرىستەر تۇگەلدەي اۆتوماتتاندىرىلعان. مۇندا بولاشاقتا 100 شاقتى ءىرى كاسىپورىن ورنالاسادى.
نۇرلان توعانبايەۆ، قۇرعاق پورتتىڭ كوممەرتسيالىق ديرەكتورى:
- 2017 -جىلمەن سالىستىرعاندا جۇك كولەمى 1,5 ەسە ءوستى. بيىل 2019 -جىلى جۇك كولەمى تاعى 1,5-2 ەسەگە دەيىن وسەدى دەپ كۇتۋدەمىز. كۇندەلىكتى 5-6 كونتەينەر پويىزىن تيەيمىز.
اۋماعى 560 گەكتار جەردى الىپ جاتقان «قورعاس» شەكارا ماڭى ىنتىماقتاستىعى حالىقارالىق ورتالىعى كۇنىنە 5 مىڭ ادامدى قابىلداي الادى. قازاقستان مەن قىتايدىڭ شەكارالاس ايماقتارىن دامىتۋ جانە ينۆەستيتسيالىق احۋالدى جاقسارتۋ ماسەلەسىندە بۇل حالىقارالىق ورتالىق ماڭىزدى ءرول اتقارادى. مۇندا اۋماعى 3500 شارشى مەترلىك جۇك وتكىزۋ تەرمينالى جۇمىس ىستەپ تۇر.
نۇرلان جايلاۋباي، جۇك وتكىزۋ تەرمينالىنىڭ ديرەكتورى:
- كولىك ينفراسترۋكتۋراسىنا 489 ميلليون تەڭگە قۇيىلعان بولاتىن. ونىڭ ىشىنەن 26 تۋريستەر مەن كەلۋشىلەردى تاسىمالدايتىن اۆتوبۋس، 30 تاكسي جانە 17 جۇك كولىگى ساتىپ الىندى. بۇدان بولەك قىتاي اۋماعىندا ءبىزدىڭ 6 جۇك قابىلداۋ پۋنكتىمىز بار. پرەمەر- مينيستر قورعاستاعى ءبىرقاتار ساۋدا ورنىن ارالاپ كورىپ، حالىقارالىق ورتالىقتىڭ باسشىلارىنا ينۆەستيتسيالىق احۋالدى بارىنشا جاقسارتۋدى تاپسىردى.
اۆتورلارى: ارداق ايبار ۇلى، ولجاس بايبوسىنوۆ
www.24.kz