استانانى تۇرعىزىپ، ەلورداعا اينالدىرعان ەلباسىنىڭ ءوزى ەمەس پە - نەسىپبەك ءداۋتاي

نۇر-سۇلتان. قازاقپارات - جازۋشى نەسىپبەك ءداۋتاي استانا قالاسى اتاۋىنىڭ نۇر-سۇلتان بولىپ وزگەرۋىنە قاتىستى پىكىر ءبىلدىردى، دەپ حابارلايدى قازاقپارات.

«نۇرسۇلتان ءابىش ۇلى - تاۋەلسىزدىكتىڭ العاشقى جىلدارىنان باستاپ قازاقستان حالقىمەن بىرگە جاساسىپ، ەلى ءۇشىن تىنباي جۇمىس ىستەپ كەلە جاتقان كورنەكتى تۇلعا. بۇل ءبىر. ەكىنشىدەن، استانا قالاسىن تۇرعىزىپ، ەلورداعا اينالدىرعان دا ءوزى ەمەس پە؟! ەندەشە، ەلورداعا «نۇر-سۇلتان» دەگەن اتاۋ بەرگەندە تۇرعان نە بار؟! استانامىز قازاقتىڭ ماڭدايىنا بىتكەن تۇلعانىڭ ەسىمىمەن اتالعانى قۇپتارلىق ءىس»، - دەيدى حالىقارالىق «الاش» ادەبي سىيلىعىنىڭ لاۋرەاتى.

جازۋشىنىڭ ايتۋىنشا، بۇل تاريحي شەشىمنىڭ جاڭا پرەزيدەنتتىڭ ۇسىنىسىمەن قابىلدانعانىنا بارلىعى كۋا.

«ەل تىزگىنىن ۇستاپ وتىرعان ازاماتتار وسىنداي قارارعا كەلسە، حالىق بوپ قولدايتىن ءجونىمىز بار. بۇل شەشىمدى جاعىمپازدىققا بالاپ جاتقاندار دا بار. كوزىمىز شالدى. جاپپاي حالىقتى بۇل ءۇشىن كۇستانالاۋدىڭ دا قاجەتى جوق. ساياسي ساۋاتى تولىق جەتىلمەگەن قاراپايىم حالىقتى ارانداتۋعا قۇمار توپتار بولادى. حالىققا ءسىز بولىپ، ءبىز بولىپ ۇعىندىرۋىمىز ءلازىم. بۇل تاريح ءوزى جولىمەن، جورالعىسىمەن شىعارعان شەشىم. «نۇر» ءسوزى دە، «سۇلتان» ءسوزى دە ساكرالدىق مانگە يە. «نۇر- سۇلتان» قالاسى دەپ اتاۋ بايتاق ەلىمىزدىڭ استاناسىنا جاراسىپ- اق تۇر. مەن ءبارىڭىزدى وسى شەشىمدى قولداپ، ۇلت بولىپ ۇيىسۋ جولىنداعى تۇتاس يدەياعا قىزمەت ەتۋگە شاقىرامىن»، - دەپ اتاپ ءوتتى نەسىپبەك ءداۋتاي.