قاسىم-جومارت توقايەۆ پرەزيدەنت لاۋازىمىنداعى ماقساتىن جاريا ەتتى
جيىن بارىسىندا قازاقستان پرەزيدەنتى ەڭ الدىمەن بارشا جۇرتشىلىقتىڭ ۇلىستىڭ ۇلى كۇنى ناۋرىز مەيرامىمەن شىن جۇرەكتەن قۇتتىقتادى.
«بيىلعى 19 -ناۋرىزدا، كوكتەمنىڭ شۋاقتى كۇنىندە ءبارىمىز ەلىمىزدەگى تاريحي وقيعاعا كۋا بولدىق. مەملەكەت بولاشاعىن ويلاعان تۇڭعىش پرەزيدەنتىمىز ماڭىزدى شەشىم قابىلدادى. وسىنداي سىندارلى كەزەڭدە ەلباسىنى جانە مەنى قولداعان بارشا حالقىما ريزاشىلىعىمدى بىلدىرەمىن. ءبىز بيلىكتىڭ اۋىسۋىن تۇراقتى جاعدايدا جۇزەگە اسىرامىز. مۇنداي جاعداي دۇنيەجۇزى تاريحىندا بۇرىن بولماعان. بۇل ەڭ الدىمەن ەلباسىنىڭ پاراساتتىلىعىن، كەڭدىگىن، سونداي- اق حالقىمىزدىڭ دانالىعىن بىلدىرەدى. ءبىز الەمگە وركەنيەتتى ەل ەكەندىگىمىزدى تانىتىپ، ۇلگى كورسەتتىك. وسىلايشا حالقىمىزدىڭ ساياسي مادەنيەتىنىڭ جوعارى ەكەندىگىن دالەلدەدىك»، - دەپ اتاپ ءوتتى ق. توقايەۆ.
سونىمەن قاتار مەملەكەت باسشىسى بۇل بولاشاق ۇرپاق ءۇشىن دە ۇلكەن ۇلگى-ونەگە ەكەندىگىن باسا ايتتى.
«مەنىڭ نەگىزگى ماقساتىم - ەلباسىنىڭ ستراتەگيالىق باعىتىنىڭ ساباقتاستىعىن قامتاماسىز ەتۋ. مەن وسى ءىستى جالعاستىرا بەرەمىن. ەلباسى بىزگە تابىستى مەملەكەت قۇرىپ بەردى. ول قازاقستاندى الەمدەگى وزىق ەلدەردىڭ قاتارىنا قوسا ءبىلدى. ەلباسى رەفورمالارى مەملەكەتتىك ورنىقتى دامۋ جولىنا شىعاردى»، - دەدى ق ر پرەزيدەنتى.
ق. توقايەۆ بۇگىندە بۇگىندە الەمدە باسەكەلەستىك پەن قاتار جاڭا سىن-قاتەرلەر ۋشىعىپ تۇرعانىن، جالپى بۇكىل دۇنيەجۇزى داعدارىسقا ۇشىراعاندىعىن اتاپ ءوتتى. الەمنىڭ بولاشاعى بۇلىڭعىر ەكەندىگىنە نازار اۋدارتتى.
«سوندىقتان توقتاپ قالۋعا مۇلدەم بولمايدى. حالقىمىزدىڭ بىرلىگى، ۇلتارالىق كەلىسىم، كۇشتى ەكونوميكا ءارى قاراي العا باسۋىمىزدىڭ نەگىزى ءارى كەپىلى»، - دەدى مەملەكەت باسشىسى.