ماي سالىنعان قارىن ناۋرىز كوجەگە ەرەكشە ءدام بەرەدى - زەرە اجەي
بۇل تاعامنىڭ جەتى ءتۇرلى دامنەن ازىرلەنەتىنىن ءبارىمىز جاقسى بىلەمىز. الايدا، كوجەنى ەلىمىزدىڭ ءار وڭىرىندە اركىم ءارقالاي پىسىرەدى.
وسىنى العا تارتىپ، قازاقپارات ءتىلشىسى مەرەكە قارساڭىندا كوپتى كورگەن، تىرلىكتەگى تاجىريبەسى مول كوكشەتاۋلىق زەرە ەسپاي قىزىن سوزگە تارتىپ، كوكشە جەرىندە ناۋرىز كوجەنى دايىنداۋ ادىسىمەن ءبولىسۋىن ءوتىندى.
باسىنان اق جاۋلىعى تۇسپەيتىن، سوزىنەن پاراسات پايىمى سەزىلەتىن، يمانى جۇزىنەن مەيىرىم بوپ توگىلەتىن زەرە قيىقوۆا اپامىزدىڭ ەسىمى ەلگە ەتەنە تانىس. وسى كۇنى زەرە اپا قازاقستان حالقى اقمولا اسسامبلەياسىنىڭ جانىنداعى انالار كەڭەسىن باسقارىپ كەلەدى.
زەرە اپانىڭ ايتۋىنشا، دامگە قوساتىن ءداندى داقىلداردى دا اركىم ءوز قالاۋىمەن سالادى: ءبىرى بيداي، ءبىرى ارپا سالىپ جاتسا، ەندى بىرەۋلەر جۇگەرى، كۇرىش، قاراقۇمىق قوسادى، ايتەۋىر تالعامىمەن تاڭداندىرىپ، ءدامدى ەتىپ ازىرلەيدى. كەيبىر انالارىمىز قۇرتتى ەزىپ، مالتا سالسا، ەندى ءبىرى ايران، قاتىق قۇيادى. سوندىقتان بولار، ءار ءوڭىردىڭ ءار ءۇيدىڭ ناۋرىز كوجەسى ءبىر- بىرىنە ۇقسامايدى.
«مەن اتا-اجەمنىڭ باۋىرىندا وسكەن ەدىم. سودان بولار، قازاقى تاربيە قانىما سىڭگەن. «ناۋرىز كوجەنى تويىپ ءىشۋ كەرەك، سوندا جىل بويى توقشىلىق بولادى!» دەگەندى ۇلكەندەردەن ءجيى ەستيتىنمىن. مەن كوجەنى ءپىسىرۋدى اجەمنەن ۇيرەنگەم. ءبىزدىڭ انالار كەڭەسى جىل سايىن ۇلىستىڭ ۇلى كۇنى قازاقستان حالقى اقمولا اسسامبلەياسىمەن بىرلەسىپ، ناۋرىز كوجە قايناتىپ، ونى مەرەكە- دۋماندى تويلاۋعا ورتالىققا جينالعان قاۋىمعا ۇلەستىرىپ كەلەدى. نەگىزى، قۇرامىنا جەتى ونىمنەن دە كوپ تاعام قوسۋعا بولادى. الدىمەن ءسۇر ەتتى پىسىرەمىز. باسقا ىدىسقا سورپاعا قوساتىن جارمالاردى بولەك- بولەك ءپىسىرىپ الامىز. جارمالاردىڭ ارتۇرىنەن قوسامىز. مىسالى كۇرىش، تارى، ارپا، قاراقۇمىق، كەيدە بۇرشاق تا قوسامىز. سودان كەيىن ءسۇر ەتتى، ورىكتى ۇساقتاپ تۋراپ، مەيىز بەن جارمالاردى بىرگە بارلىعىن ەت پىسكەن سورپاعا قۇرتتى ەزىپ ارالاستىرامىز. كوجە دايىن بولعاننان كەيىن قايماق قوسامىز. جالپى، ءاربىر ادامنىڭ وزىندىك دايىنداۋ ءتاسىلى بولادى. ءوز بىلگەنىممەن ءبولىسىپ جاتىرمىن. ونداعى ويىم وسكەلەڭ ۇرپاق وي ءتۇيسىن، ۇيرەنسىن دەگەنىم عوي»، - دەيدى اپا.
سونىمەن قاتار، زەرە ەسپاي قىزى وڭىردە كەيبىر كونە كوز قاريالاردىڭ ماي ساقتاعان قارىندى تازالاپ جۋىپ، كوجەنىڭ تۇبىنە سالاتىنىن دا ايتۋدا. مۇنداي ناۋرىز كوجە وتە ءدامدى بولاتىن كورىنەدى.
«بۇل - ەجەلدەن كەلە جاتقان كونە ءادىس. قارىنعا تۇز ابدەن سىڭگەندىكتەن دە كوجەگە ەرەكشە ءدام بەرەدى»، - دەيدى زەرە قيىقوۆا.