حالىقارالىق بوكس قاۋىمداستىعىنىڭ پرەزيدەنتى وتستاۆكاعا كەتەتىنىن ءمالىم ەتتى
گافۋر راحيموۆتىڭ مالىمدەمەسى 22 -ناۋرىز كۇنى aiba.org سايتىندا جاريالاندى.
وندا AIBA باسشىسى «وعان قارسى قولدان جاسالعان ايىپتاۋلاردىڭ» شىندىققا جاناسپايتىنىن، ولار «ساياسي ءۋاجدى جالعاندىققا» نەگىزدەلگەنىن اتاپ وتكەن. «دەگەنمەن، مەن بوكسقا جانە سپورتشىلارعا قىزمەت ەتۋ ءۇشىن بارلىعىن جاساۋعا مىندەتتىمىن»، - دەدى ول.
گافۋر راحيموۆ حالىقارالىق وليمپيادالىق كوميتەتتىڭ (ح و ك) ونىڭ كانديداتۋراسىنا قارسى ايتقان كۇدىكتەرى، ەسكەرتۋلەرى، ءتىپتى ۋلتيماتۋمدارىنا قاراماستان، 2018 -جىلدىڭ قاراشاسىندا حالىقارالىق بوكس قاۋىمداستىعىنىڭ پرەزيدەنتى بولىپ سايلانعان ەدى. سايلاۋ ماسكەۋدەگى كونگرەسس بارىسىندا ءوتتى. ماسەلەن، راحيموۆ حالىقارالىق قىلمىستىق ۇيىم كوشباسشىلارىنىڭ ءبىرى رەتىندە اقش قارجى مينيسترلىگىنىڭ سانكتسيالىق تىزىمىنە ەنگىزىلگەنى ايتىلعان ەدى.
حالىقارالىق وليمپيادالىق كوميتەت راحيموۆتى پرەزيدەنتتىك لاۋازىمعا ۇسىنۋ بوكستىڭ وليمپيادالىق باعدارلاماسىنا كەرى ىقپالىن تيگىزۋى مۇمكىندىگىن بىردەن ايتقان بولاتىن. حوك سايلاۋدان كەيىن AIBA- مەن بارلىق قارىم- قاتىناسىنا توقتاۋ قويىپ، وليمپيادالىق بوكس باعدارلامالارىن قارجىلاندىرۋدى دوعاردى. سونداي-اق 2020 -جىلعى توكيو وليمپياداسىنا بوكسشىلاردى ىرىكتەۋ باعدارلاماسىن توقتاتتى.
AIBA پرەزيدەنتىنىڭ 22 -ناۋرىز كۇنگى مادىمدەمەسىندە اتاپ كورسەتىلگەندەي، اپتا سوڭىندا ۇيىمنىڭ اتقارۋشى كوميتەتىنىڭ وتىرىسى شاقىرىلاتىن بولادى. وندا ونىڭ وتستاۆكاعا كەتۋى جانە ۋاقىتشا پرەزيدەنتتى تاڭداۋ ماسەلەسى قارالادى.