ق ر پرەزيدەنتى ەليزابەت تۇرسىنبايەۆانى جەڭىسىمەن قۇتتىقتادى

استانا. قازاقپارات - قازاقستان پرەزيدەنتى قاسىم-جومارت توقايەۆ الەم چەمپيوناتىندا «كۇمىس» ەنشىلەگەن مانەرلەپ سىرعاناۋشى ەليزابەت تۇرسىنبايەۆانى جەڭىسىمەن قۇتتىقتادى، دەپ حابارلايدى قازاقپارات.

«ەليزابەت تۇرسىنبايەۆا مانەرلەپ سىرعاناۋدان الەم چەمپيوناتىنىڭ كۇمىس جۇلدەگەرى بولدى! تاريحتا تۇڭعىش رەت ءتورت اينالىم ءادىسىن ورىندادى! جارايسىڭ! قۇتتىقتايمىن!»، - دەپ جازدى ق. توقايەۆ Twitter- دەگى پاراقشاسىندا.

ايتا كەتەيىك، سپورتشىنى ق ر مادەنيەت جانە سپورت ءمينيسترى ارىستانبەك مۇحامەدي ۇلى دا قۇتتىقتادى.

«الەم چەمپيوناتىندا ەليزابەت الەمدە تۇڭعىش رەت ءتورت اينالىمعا سەكىرۋ ەلەمەنتىن ورىندادى. وسى جەڭىسپەن ەليزابەتتى، ونىڭ اتا-اناسىن، باپكەرى ەتەري تۋتبەريدزەنى شىن جۇرەكتەن قۇتتىقتايمىن! بارشا قازاقستاندىقتاردى ءبىزدىڭ مانەرلەپ سىرعاناۋشىمىزدىڭ سەنساتسيالىق جەڭىسىمەن قۇتتىقتايمىن! ماراپاتتاۋ ءراسىمىن قاراپ وتىرمىز. قۋانىشتىمىز!»، - دەپ جازدى ول Facebook پاراقشاسىندا.

بۇعان دەيىن حابارلاعانىمىزداي، جاپونيانىڭ سايتاما قالاسىندا ءوتىپ جاتقان مانەرلەپ سىرعاناۋدان الەم چەمپيوناتىندا قازاقستاندىق ەليزابەت تۇرسىنبايەۆا كۇمىس مەدال جەڭىپ الدى.

ول ەركىن باعدارلامانى تاماشا ورىنداپ، قورىتىندىدا 224,76 بالل جينادى. سپورتشىلاردىڭ ەڭ سوڭىنان شىققان ە. تۇرسىنبايەۆا ەرەسەكتەر اراسىنداعى الەم چەمپيوناتىندا تۇڭعىش رەت ءتورت اينالىمدىق سالحوۆ ەلەمەنتىن ورىندادى. مۇنى شىن مانىندە تاريحي ناتيجە دەۋگە بولادى. رەسەيلىك الينا زاگيتوۆا 237,50 بالمەن الەم چەمپيونى اتاندى. ونىڭ وتانداسى ەۆگەنيا مەدۆەديەۆا 223,80 بالمەن ءۇشىنشى ورىنعا كوتەرىلدى. وسىلايشا، 19 جاستاعى ەليزابەت تۇرسىنبايەۆا قىزدار اراسىندا قازاقستاننان العاش رەت الەم چەمپيوناتىنىڭ جۇلدەگەرى اتاندى.

جارىس سوڭىندا وتكەن باسپا ءسوز ءماسليحاتىندا سپورتشى قىز بۇل مەدال كۇتپەگەن جۇلدە بولعانىن اتاپ ءوتتى.

«قازىرگى قۋانىشىمدا شەك جوق. كۇمىس مەدال مەن ءۇشىن كۇتپەگەن جۇلدە بولدى. وسى ساتكە دەيىن بۇل ەلەمەنتتى (تورتتىك سالحوۆ - اۆت. ) تازا ورىنداعانىما سەنە الار ەمەسپىن. تاڭەرتەڭگى جاتتىعۋ ساتىمەن ءوتتى. سوڭعى ەكى جارىستا سالحوۆتى ورىنداۋ بارىسىندا قاتە جىبەرگەنىمدى بىلەسىزدەر. مىنە، بۇگىن تازا ورىنداپ شىقتىم. مۇز ايدىنىنا بەت العان كەزدە ءوزىمدى كەرەمەت سەزىنگەنمىن. سول سەزىم سوڭىنا دەيىن جوعالعان جوق، - دەپ كەلتىردى تۇرسىنبايەۆانىڭ ءسوزىن ق ر ۇلتتىق وليمپيادالىق كوميتەتى.