فۋتبول: قازاقستان قۇراماسى شوتلانديانى ءىرى ەسەپپەن جەڭدى
دەپ حابارلايدى قازاقپارات ءتىلشىسى.
ەستەرىڭىزگە سالا كەتەلىك، كەشە 2020 -جىلعى ەۋروپا چەمپيوناتى ىرىكتەۋ كەزەڭىندەگى I توبىنداعى العاشقى تۋر ويىندارى باستالدى. العاشقى تۋردا ءبىزدىڭ جىگىتتەر شوتلانديانى قۇراماسىن قابىلدادى. ايتا كەتەرلىگى، شوتلانديا ءبىزدىڭ قۇرامانىڭ جالپى بۇگىنگە دەيىن كەزدەسكەن الپىس التىنشى، ەۋروپاداعى وتىز جەتىنشى قارسىلاسى بولىپ وتىر.
جانكۇيەرلەر شوتلانديا قۇراماسى جايىندا جاقسى بىلەدى. بۇرىنعى جىلداردا ولار الەمدىك دودالاردا ءجيى بوي كورسەتىپ جاتاتىن. الايدا سوڭعى كەزەڭدە اتالمىش قۇراما الەم جانە قۇرلىق چەمپيوناتى فينالدىق كەزەڭىنە شىعا الماي كەلەدى. ايتالىق، ولار الەم چەمپيوناتىندا 2002 -جىلدان بەرى باق سىناۋدان شەت قالىپ جۇرسە، ەۋروپا ۇزدىكتەرىنىڭ قاتارىندا 2000 -جىلدان باستاپ بوي كورسەتكەن جوق. دەگەنمەن ىرىكتەۋ كەزەڭدەرىندە ءوز توبىندا جولداماعا قول سوزىمدا قالىپ قويىپ ءجۇردى.
العاشقى مينۋتتان ءبىزدىڭ قۇراما ساپىندا دميتري نەپوگودوۆ، عافۋرجان سۇيىمبايەۆ، تەمىرلان ەرلانوۆ، سەرگەي مالىي، ەۆگەنيي پوستنيكوۆ، يان ۆوروگوۆسكيي، يسلامبەك قۋات، الەكساندر مەركەل، يۋريي پەرسۋح، باكتييەر زاينۋتدينوۆ جانە رومان مۋرتازايەۆ شىقتى. ال شوتلانديا قۇرامىندا سكوتت بەين، ليام پالمەر، گرەم شينني، سكوتت ماككەنا، دەۆيد بەيتس، كاللۋم ماكگرەگور، دجون ماكگينن، دجەيمس فوررەست، ستيۋارت ارمسترونگ، وليۆەر بەرك، وليۆەر ماكبەرني بولدى.
ويىن باسىندا شوتلانديا قۇراماسى شابۋىلعا كوبىرەك شىعۋعا كوڭىل ءبولدى. دەگەنمەن ءبىزدىڭ جىگىتتەر دە قارىمتا شابۋىل ۇيىمداستىرۋعا نازار اۋداردى. وسىلايشا ولار العاشقى مينۋتتاردا قارسىلاستار قاقپاسىنان ساڭىلاۋ تاۋىپ كەتتى. I توبىنداعى العاشقى گولدى ءبىزدىڭ جىگىتتەر سوقتى. ويىننىڭ 6-مينۋتىندا گوللانديانىڭ «حەراكلەس» كومانداسىندا وينايتىن الەكساندر مەركەل ارىپتەسى يۋريي پەرتسۋحقا ادەمى پاس شىعارىپ بەردى. مۇنداي مۇمكىندىكتى يۋريي قۇر جىبەرسىن بە؟ ەسەپ اشىلدى. ارادا ءتورت مينۋت وتكەندە ءبىزدىڭ جىگىتتەر ەسەپتى ۇستەمەلەي ءتۇستى. بۇل جولى قۇراما كاپيتانى يسلامبەك قۋات جەكە شەبەرلىگىنىڭ ارقاسىندا يان ۆوروگوۆسكييگە گول سوعاتىن مۇمكىندىك جاسادى. قارسىلاستار قاقپاسىنا تاعى ءبىر گول سوعىلدى. ەسەپ 2:0. قازاقستان قۇراماسى باسىمدىعىن ارتتىرا ءتۇستى. بۇدان كەيىن يسلامبەك قۋاتتىڭ الىستان تەپكەن دوبىن شوتلاند قاقپاشىسى سكوتت بەين سىرتقا ارەڭ شىعاردى. ءبىرىنشى كەزەڭدە قوس قۇرامادا دا بۇدان باسقا ەسەپتى وزگەرتەتىن ساتتەر بولعان ەدى. دەگەنمەن تابلوداعى ەسەپ وزگەرە قويعان جوق.
ەكىنشى كەزەڭدە قارسىلاس قۇراما وزدەرىنىڭ بەكەر كەلمەگەنىن اڭعارتىپ، ءبىزدىڭ قاقپاعا شابۋىلعا شىعۋعا كوڭىل ءبولدى. دەگەنمەن ويلاعانىن جۇزەگە اسىرا العان جوق. ەسەسىنە ءبىزدىڭ جىگىتتەر تاعى ءبىر گول سوعىپ كەتتى. عافۋرجان سۇيىمبايەۆتىڭ سول قاناتتان اۋەلەتە بەرگەن دوبىن بۇگىندە رەسەيدىڭ «روستوۆ» كومانداسىندا ويناپ جۇرگەن باكتيەر زاينۋتدينوۆ باسپەن قاقپانىڭ وڭ جاعىنا باعىتتادى. وعان سكوتت بەين توسقاۋىل قويا العان جوق. ەسەپ 3:0. قازاقستان قۇراماسى وسىلايشا ءوز جانكۇيەرلەرىنە ۇلىستىڭ ۇلى كۇنى - ناۋرىز مەرەكەسىنە تولايىم تارتۋ جاسادى.
ءبىزدىڭ قۇراما ەندى 24 - ناۋرىزدا رەسەي قۇراماسىن قابىلدايدى. ءدال وسى كۇنى اتالمىش توپتا كيپر مەن بەلگيا، سان- مارينو مەن شوتلانديا قۇرامالارى كەزدەسەدى.
قازاقستان سوڭعى رەت ءوز الاڭىندا 2018 -جىلدىڭ 16 - قازانىندا اندوررا قۇراماسىن 4:0 ەسەبىمەن جەڭگەن ەدى. بۇل ۇلتتار ليگاسىنىڭ ىرىكتەۋ كەزەڭى بولاتىن.
بۇگىن I توبىندا تاعى ەكى ويىن بولادى. اتاپ ايتقاندا، كيپر مەن سان مارينو، بەلگيا مەن رەسەي قۇرامالارى كەزدەسەدى. ويىندار ەلوردا ۋاقىتىمەن 00.45-تە باستالادى.
اۆتور: ءادىلجان ۇمبەت