ا ق ش مەملەكەتتىك دەپارتامەنتى نۇرسۇلتان نازاربايەۆتىڭ ءوز وكىلەتتىگىن توقتاتۋىنا قاتىستى پىكىر ءبىلدىردى
بۇل تۋرالى ا ق ش مەملەكەتتىك دەپارتامەنتىنىڭ رەسمي وكىلىنىڭ ورىنباسارى روبەرت پاللادينونىڭ نۇرسۇلتان نازاربايەۆتىڭ قازاقستان رەسپۋبليكاسىنىڭ پرەزيدەنتى وكىلەتتىگىن توقتاتۋىنا قاتىستى جاساعان مالىمدەمەسىندە ايتىلدى.
«قۇراما شتاتتار تۇڭعىش پرەزيدەنت نۇرسۇلتان نازاربايەۆتىڭ ا ق ش پەن قازاقستان اراسىندا تىعىز ءارى قارقىندى قارىم- قاتىناستى ورناتۋعا جانە ونى العا جىلجىتۋعا قوسقان ۇلەسىن جوعارى باعالايدى.
قازاقستان ءۇشىن وسى تاريحي ساتتە بۇگىنگى زاماناۋي، ەگەمەندى جانە گۇلدەنگەن قازاقستاننىڭ نەگىزىن قالاۋشى رەتىندە ن. ءا. نازاربايەۆتىڭ رولىنە قۇرمەت بىلدىرەمىز جانە وڭىرلىك، جاھاندىق اۋقىمدا جاۋاپتى باسشى رەتىندە كورسەتكەن ۇلگىسىن مويىندايمىز»، - دەلىنگەن مالىمدەمەدە.
«ءبىز سونداي- اق ونىڭ يادرولىق قارۋدى تاراتپاۋ سالاسىنداعى ەلەۋلى ەڭبەگىنە جانە دەنۋكلەاريزاتسيا بويىنشا جاھاندىق كۇش- جىگەردەگى كوشباسشىلىعىنا، بيلىكتى بەيبىت جولمەن تاپسىرۋداعى ۇلگى بولارلىق ۇستانىمىنا، سونداي- اق قازاقستاندا جانە ءبۇتىن وڭىردە بەيبىتشىلىك پەن گۇلدەنۋدى قامتاماسىز ەتۋگە قوسقان ۇلەسىنە قوشەمەت بىلدىرەمىز.
قازاقستانمەن اراداعى قارىم- قاتىناسىمىز گۇلدەنۋدىڭ ورتاق يدەالدارىنا، نەگىزگى بوستاندىقتاردى قۇرمەتتەۋگە جانە وڭىرلىك قاۋىپسىزدىككە نەگىزدەلگەن.
قازاقستاننىڭ جاڭا پرەزيدەنتى قاسىم- جومارت توقايەۆتى قۇتتىقتايمىز جانە ەكى ەل اراسىنداعى كەڭ ستراتەگيالىق ارىپتەستىكتى تەرەڭدەتۋ، ەكونوميكالىق دامۋ، ساۋدا جانە ينۆەستيتسيا سالالارىندا ۇزاقمەرزىمدى ءوزارا مۇددەلەرىمىزدى العا جىلجىتۋ، سونداي- اق وڭىرلىك جانە جاھاندىق قاۋىپسىزدىكتى قامتاماسىز ەتۋ بويىنشا بىرلەسكەن جۇمىسىمىز جالعاساتىنىنا ءۇمىت ارتامىز»، - دەلىنگەن قۇجاتتا.
اۆتور: ميرا تولەندى قىزى