فۋتبول: قازاقستان قۇراماسى شوتلانديانى جەڭە الا ما؟
قازاقستان قۇراماسى اتالمىش توپتا سىنعا تۇسەدى. قارسىلاستارى - بەلگيا، رەسەي، شوتلانديا، كيپر جانە سان-مارينو قۇرامالارى. ىرىكتەۋ كەزەڭى 21- ناۋرىزدا باستالىپ، 19- قاراشادا مارەسىنە جەتەدى. فينالدىق كەزەڭنىڭ ەرەكشەلىگى، تۇڭعىش رەت ءدۇبىرلى دودا ەۋروپانىڭ بىرنەشە مەملەكەتىندە وتكىزىلەدى. بۇل شارا ەۋروپا چەمپيوناتىنىڭ 60 جىلدىق مەرەيتويىنا ورايلاستىرىلىپ وتىر. 2024-جىلعى ەۋروپا چەمپيوناتىنىڭ فينالدىق كەزەڭى بۇرىنعى فورماتتا ۇيىمداستىرىلادى.
ءبىزدىڭ قۇراما ىرىكتەۋ كەزەڭىندەگى العاشقى ەكى ويىنىن ءوز الاڭىندا وتكىزەدى. قازاقستان فۋتبولشىلارى بۇگىن ەلوردامىزدا شوتلانديانى قابىلداسا، 24- ناۋرىزدا رەسەيمەن شەبەرلىك بايقاسادى.
جانكۇيەرلەر شوتلانديا قۇراماسى جايىندا جاقسى بىلەدى. بۇرىنعى جىلداردا ولار الەمدىك دودالاردا ءجيى بوي كورسەتىپ جاتاتىن. الايدا سوڭعى كەزەڭدە اتالمىش قۇراما الەم جانە قۇرلىق چەمپيوناتى فينالدىق كەزەڭىنە شىعا الماي كەلەدى. ايتالىق، ولار الەم چەمپيوناتىندا 2002-جىلدان بەرى باق سىناۋدان شەت قالىپ جۇرسە، ەۋروپا ۇزدىكتەرىنىڭ قاتارىندا 2000-جىلدان باستاپ بوي كورسەتكەن جوق. دەگەنمەن ىرىكتەۋ كەزەڭدەرىندە ءوز توبىندا جولداماعا قول سوزىمدا قالىپ قويىپ ءجۇردى.
سول كەتكەن ولقىلىقتىڭ ورنىن بيىل تولتىرا الا ما؟ راس، I توبىنداعى قارسىلاستارى وسال ەمەس. بۇدان بۇرىنعى جىلداردا الەمدىك دودالاردا الدىڭعى قاتاردان كورىنىپ جۇرگەن بەلگيا مەن رەسەي قۇرامالارى ولارعا وڭاي تيە قويمايتىنى بەلگىلى. قاي قۇرامانىڭ اسىعى الشىسىنان تۇسەدى. ونى ۋاقىتىندا باعامدايتىن بولامىز.
بۇگىنگى تاڭدا شوتلانديا قۇراماسى ساپىندا كوپتەگەن جاس فۋتبولشىلار ەل نامىسىن قورعاۋعا مۇمكىندىك الدى. ايتا كەتەرلىگى، ولاردىڭ كوپشىلىگى انگليا پرەمەر-لياسىندا ويىن كورسەتەدى. تۇماندى البيونداعى اتالمىش دوپ دوداسى الەمدە ۇزدىك رەتىندە باعالاندى. سوندىقتان ولاردىڭ شەبەرلىك دەڭگەيىن جوعارى باعالاۋعا نەگىز بار. مۇنداي فۋتبولشىلار قاتارىندا «ليۆەرپۋل» نامىسىن قورعايتىن ەندريۋ روبەرتسون، «بلەكبەرن روۆەرس» ويىنشىسى چارلي مالگريۋ، «استون ۆيللادان» دجون ماكلينن، «ساۋتگەمپتوننان» ستيۋارت ارمسترونگ سەكىلدى جىگىتتەر الداعى كۇندەردە ءوز قۇرامالارىن ورگە سۇيرەيدى دەگەن سەنىم بار.
ايتا كەتەرلىگى، قازاقستان قۇراماسى ەۋروپا چەمپيوناتى ىرىكتەۋ كەزەڭىن جاڭا باپكەرمەن باستايدى. بيىل قۇراما تىزگىنىن چەح مامانى ميحال بيلەك ۇستادى. چەح مامانى نەگىزىنەن جاستارعا سەنىم ارتاتىنىن ءمالىم ەتتى. سوندىقتان بۇگىنگى كەزدەسۋدە ەلوردالىق جانكۇيەرلەر تارتىستى ويىن بارىسىن تاماشالايدى دەگەن ءۇمىتىمىز زور.
قازاقستان مەن شوتلانديا قۇرامالارى بۇگىنگى كۇنگە دەيىن بىردە-ءبىر مارتە رەسمي نەمەسە جولداستىق كەزدەسۋ وتكىزىپ كورگەن جوق. دەگەنمەن ەكى ەلدىڭ كوماندالارى ەۋروكۋبوك ويىندارىندا شەبەرلىك بايقاسقان ەدى. قازاقستاندىق كلۋبتار «سەلتيكپەن» بىرنەشە مارتە جولىقتى. سونداي-اق، اتالمىش ەلدىڭ «ابەردين» كلۋبى دا ءبىزدىڭ كوماندامەن باق سىناستى.
قازاقستان مەن شوتلانديا قۇرامالارى اراسىنداعى كەزدەسۋ ەلوردا ۋاقىتىمەن 21.00 دە باستالادى. ويىن «QazSport» تەلەارناسىنان تىكەلەي ەفيردە كورسەتىلەدى.