قازاقستاندا «قىزعالداق سىيلا» چەللەندجى باستالدى
«Nur Otan» پارتياسىنىڭ «جاس وتان» جاستار قاناتى ۇيىتقى بولعان «قازاقستان - قىزعالداقتار وتانى» رەسپۋبليكالىق اكسياسى مەن «قىزعالداق سىيلا» چەللەندجى وسىلاي باستالدى. اتالمىش ءىس-شارالار ناۋرىز مەرەكەسىنە ارنالدى، دەپ حابارلايدى قازاقپارات ءتىلشىسى.
اۋا رايىنىڭ قىتىمىرلىعىنا قاراماستان اكسيا قاتىسۋشىلارى قالا تۇرعىندارىنا جىلىلىق پەن مەيىرىم، ادەمى كوڭىل-كۇي سىيلاي ءبىلدى.
ەلىمىزدە وتكەن قازاقستان مەن شوتلانديا اراسىنداعى فۋتبول ماتچىن تاماشالاۋ ءۇشىن ارنايى كەلگەن جانكۇيەرلەردىڭ ءبىرى ەسىل جاعالاۋىندا سەرۋەندەپ جۇرگەن بولاتىن. ول اۋا رايىنىڭ سالقىندىعىنا قاراماستان شوتلاندىقتاردىڭ ۇلتتىق كيىمى - كيلت كيىپ الىپتى.
چەللەندج بەن اكسيا تاقىرىبىنا قىزعالداقتىڭ تاڭدالۋى كەزدەيسوقتىق ەمەس - قىزعالداقتىڭ ۇلتتىق يگىلىگىمىز ەكەنى ايدان انىق. جەر بەتىندە وسىدان 10-15 ميلليون جىل بۇرىن پايدا بولعان قىزعالداقتىڭ وتانى - قازىرگى قازاقستان رەسپۋبليكاسى ورنالاسقان اۋماق ەكەنى بەلگىلى. قازاقستاندا قازىردىڭ وزىندە قىزعالداقتىڭ 38 ءتۇرى وسەدى. بۇل - جەر بەتىندە ءوز بەتىمەن وسەتىن، عىلىمدا بەلگىلى 80 ءتۇرلى جابايى قىزعالداقتىڭ جارتىسىنا جۋىعى.
ادەمى جانە كۇي تالعامايتىن بۇل گۇل ادامزاتپەن ەتەنە ءوستى، كوپ عاسىردان بەرى ادامزات ونىڭ 3 مىڭنان استام ءتۇرىن ءوسىرىپ شىعاردى. وكىنىشكە قاراي، ءبىزدىڭ ەلىمىزدە قىزعالداقتى جاپپاي ءوسىرۋ قولعا الىنباعان. ناۋرىز نەمەسە 8- ناۋرىز سەكىلدى مەرەكەلەردە گۇلدىڭ كوپشىلىگى قىزعالداق ءوسىرۋدى كاسىپ ەتكەن گوللانديادان ۇشاقپەن جەتكىزىلەدى. بۇگىندە قىزعالداق ءوسىرۋ، جاڭا تۇرلەرىن جاساپ شىعارۋ مەن ساتۋدا ەۋروپالىقتار بۇكىل الەمنىڭ الدىندا كەلە جاتىر.
«سوعان قاراماستان، بۇل عاجاپ گۇلدىڭ بەسىگى، ءتۇپ-تامىرى ءبارىبىر وسى ەلدە، سوندىقتان «قازاقستان - قىزعالداقتىڭ وتانى» دەپ سەنىممەن ايتا الامىز. مىنە، سوندىقتان «جاس وتان» جاستار قاناتى ءاربىر ادامعا ۇندەۋ جولدايدى - «قىزعالداق سىيلا» باستاماسىنا ءۇن قوسىڭىزدار! گۇل سىيلاڭىزدار. ال ءبىز ەستافەتانى الماتى قالاسىنا جولدايمىز. اكسيانىڭ كەلەسى كەزەڭى سوندا وتەدى.
گۇل تارتۋ ەتكەندە ءوز شارۋاسىمەن اسىعىس كەتىپ بارا جاتقان ادامداردىڭ قالاي وزگەرەتىنىن، ەرىكسىز جىميىپ، شىنايى قۋانىشقا بولەنەتىنىن بايقايسىزدار ما؟ ويتكەنى، قىزعالداق - تابيعاتتىڭ جاڭارۋىنىڭ ءتىرى سيمۆولى، سۇلۋلىقتىڭ بەلگىسى»، - دەيدى اكسيا ۇيىمداستىرۋشىلارى.