جۇرگىزۋشى مەكتەپ اۆتوبۋسىن ىشىندەگى بالالارمەن قوسا ورتەپ جىبەردى
ول سول اۆتوبۋسپەن بىرنەشە پوليتسيا كولىگىن سوعىپ ءوتىپ، سوسىن ىشىندەگى بالالارمەن قوسا ورتەپ جىبەرگەن. وعان دەيىن ىشتەگى كەي بالالاردى بايلاپ تاستاعان، دەپ حابارلايدى قازاقپارات BBC سىلتەمە جاساپ.
يتاليا پوليتسياسىنىڭ مالىمەتىنشە، اۆتوبۋستى ورتەر الدىندا جۇرگىزۋشى بالالارعا «ەشكىم ءتىرى قالمايدى» دەگەن. الايدا، شىن مانىندە ەشكىم ولگەن جوق، بالالار اۆتوبۋستىڭ ارتقى تەرەزەسى ارقىلى سىرتقا شىعىپ ۇلگەردى. تەرەزەنى اۆتوبۋستىڭ سوڭىنان قۋىپ جەتكەن پوليتسەيلەر سىندىرعان بولاتىن.
پوليتسيا مالىمەتىنشە، وقيعا سالدارىنان 14 ادام تۇتىننەن ۋلانعان، دەگەنمەن ولاردىڭ ومىرىنە قاۋىپ ءتونىپ تۇرعان جوق.
«بۇل ناعىز عاجايىپ. ايتپەسە ءبىر ادام دا امان قالماي، ناعىز تراگەديا بولار ەدى»، - دەدى ميلاننىڭ باس پروكۋرورى فرانچەسكو گرەكو.
جۇرگىزۋشى تۇتقىندالدى. ول - سەنەگالدا تۋىپ-وسكەن 47 جاستاعى يتاليا ازاماتى ەكەن. اۆتوبۋستا بالالارمەن بىرگە بولعان مۇعالىمنىڭ سوزىنشە، جۇرگىزۋشى يتاليانىڭ كوشى-قون ساياساتىنا كوڭىلى تولمايتىنىن بىرنەشە رەت ايتقان.
كەي ب ا ق وكىلدەرى جۇرگىزۋشى «جەرورتا تەڭىزىندەگى ادام ولىمىنە توسقاۋىل قويۋدى» تالاپ ەتكەنىن جازدى.