تۇڭعىش پرەزيدەنت - ەلدەگى تىنىشتىق پەن تاتۋلىقتىڭ تۇراقتى كەپىلى
وسىعان وراي، تۇركىستان ءوڭىرىنىڭ زيالى قاۋىم وكىلدەرى تۇڭعىش پرەزيدەنت جايىندا ءوز پىكىرلەرىن ءبىلدىردى.
«ميلليونداعان ادامدار ۇقساۋعا تىرىسقان ۇلت كوشباسشىسى ۋاقىتىنان بۇرىن وكىلەتتىگىن توقتاتىپ، پرەزيدەنتتىك لاۋازىمىن تاپسىردى. تۇڭعىش پرەزيدەنت نۇرسۇلتان نازاربايەۆتىڭ قازاقستان ءۇشىن جاساعان يگى ىستەرىنە ەل ءدان ريزا. تاۋەلسىز جاس مەملەكەتتىڭ ەڭ ءورشىل جوبالارى ىسكە استى. حالىققا جاساعان قىزمەت ەلباسىنىڭ ەرىك-جىگەرى، شىنايى وتان سۇيگىشتىگى، دانالىعى، كەمەلدىگى تۋرالى ەل اۋزىندا ءالى ايتىلا بەرەدى. تۇڭعىش پرەزيدەنت - ەلدەگى تىنىشتىق پەن تاتۋلىقتىڭ تۇراقتى كەپىلى بولا ءبىلدى. قيىن جاعدايلاردا باتىل شەشىم قابىلدادى. ولار ءوزىن-ءوزى اقتاپ، ەلىمىزدىڭ وركەندەۋىنە سەرپىن بەردى. نۇرسۇلتان نازاربايەۆ ءوزىنىڭ بارلىق كۇش-قۋاتى مەن مۇمكىندىگىن پايدالا وتىرىپ، العا قويعان بارلىق ماقساتتى جوسپارلاردى ىسكە اسىردى. اتا-بابالارىمىزدان مۇرا بولعان بەيبىتشىلىك پەن كەلىسىمدى ساقتاي ءبىلدى. نۇر- اعامىز - تاريحتا قالاتىن تۇلعا. ءبىز ءالى سىزبەن بىرگەمىز، قادىرلى ەلباسى!»، - دەيدى قوعام قايراتكەرى دوسىباي شەرىمقۇلوۆ.
ال اقىن ءحانبيبى ەسەنقارا قىزىنىڭ پىكىرىنشە، حالىقتىڭ بىرلىگى مەن بەرەكەسى، ۇلتتاردىڭ تاتۋلىعى، ەلدىڭ تىنىشتىعى - ءبارى دە ەلباسىنىڭ جۇرگىزگەن سارابدال ساياساتىنىڭ جەمىسى. قازاقستان مەملەكەتىنىڭ تاۋەلسىزدىگى جولىندا تالاي قيىندىقتاردى باستان وتكەرسە دە ەلدىڭ ەكونوميكاسى مەن الەۋەتىن كوتەرۋدە ەلباسى بارلىق كۇش-قايراتىن جۇمسادى.
«بۇگىندە الەمدىك دەڭگەيدە اۋىز تولتىرىپ ايتارلىقتاي جەتىستىكتەرگە جەتتىك. الەمدە بولىپ جاتقان داعدارىسقا مويىماعان قازاقستان بيىك بەلەستەردى باعىندىرىپ، ەڭسەلى ەلگە اينالدى. كۇنى كەشە وبلىستا ورىن العان ماڭىزدى وقيعالاردىڭ ءبىرى - وبلىس ورتالىعىن كيەلى تۇركىستانعا اۋىستىرۋى مەن شىمكەنت قالاسىن ءۇشىنشى مەگوپوليس قالالاردىڭ قاتارىنا ەنگىزۋى تۋرالى جارلىقتارى ەدى. جەرىمىزدىڭ كەڭدىگى عانا ەمەس، حالىقتىڭ سانى جاعىنان دا ماقتاناتىن جاعدايعا جەتتىك»، - دەيدى ءحانبيبى ەسەنقارا قىزى.
«كەشەگى ك س ر و تاراعاننان كەيىن بوس كەڭىستىكتە قالعان قازاقستاندى ەكونوميكالىق جاعىنان تۋرالاعان كۇيىندە قابىلداپ العان ن. نازاربايەۆ ءوز ەلىن الەمدىك دەڭگەيگە جەتكىزۋ جولىندا جانقيارلىقپەن قالاي كۇرەسكەنى كوز الدىمىزدا. ءيا، وعان وڭاي بولعان جاق. ەل دامۋى مۇلدەم باسقا ارناعا بۇرىلدى. نارىقتىق قاتىناس كەزىندە ادامدار قالاي ءومىر ءسۇرۋدىڭ جولدارىن بىلگەن جوق. دەگەنمەن، دامۋدىڭ داڭعىل جولى بىرەۋ- اق ەدى. مىنە، سونى نۇرەكەڭ اسقان كورەگەندىكپەن تاني ءبىلدى. ارينە، ۋاقىت تالابىنا، زامانا تالابىنا بارلىعىمىز باس يەمىز. ونىڭ وتە جوعارى لاۋازىمىنان ءوز ەركىمەن باس تارتۋى دا ونىڭ وتە اقىلدى ءارى سۇڭعىلا ساياساتكەر ەكەنىن كورسەتەدى. كوڭىلگە ۇلكەن دەمەۋ بولاتىنى ۇلت كوشباسشىسى ءالى دە اتىنان تۇسكەن جوق. ول قاسىمىزدا، تاۋەلسىز ەلىن تۇعىرلى ەتۋ جولىندا بۇرىنعىسىنان دا جىگەرلى ەڭبەك ەتە بەرمەك»، - دەپ اتاپ ءوتتى قوعام قايراتكەرى ورىنباي راحمانبەرديەۆ.