الەم چەمپيوناتى: تۇرسىنبايەۆا قىسقا باعدارلامادان كەيىن ءۇشىنشى كەلەدى

استانا. قازاقپارات - بۇگىن جاپونيانىڭ سايتاما قالاسىندا ءوتىپ جاتقان مانەرلەپ سىرعاناۋدان الەم چەمپيوناتى اياسىندا ايەلدەر اراسىنداعى قىسقا باعدارلاما باسەكەسى اياقتالدى.

قازاقستاندىق ەليزابەت تۇرسىنبايەۆا العاشقى سىننان سوڭ ءۇشىنشى ورىندا تۇر، دەپ حابارلايدى قازاقپارات.

ق ر ۇلتتىق وليمپيادالىق كوميتەتىنىڭ اقپاراتىنا سايكەس، جارىس سوڭىنداعى باسپا ءسوز ءماسليحاتىنا قاتىسقان تۇرسىنبايەۆاعا الەم چەمپيوناتىنىڭ كىشى قولا جۇلدەسى تابىستالدى. بۇل قازاقستان ءۇشىن تاريحي مەدال. ويتكەنى، بۇگىنگە دەيىن مانەرلەپ سىرعاناۋشى قىزدارىمىز مۇنداي تابىسقا جەتكەن ەمەس.

«بۇگىنگى ونەرىم كوڭىلىمنەن شىقتى. كورەرمەندەر دە، مۇز ايدىنى دا تاماشا. جاپونيانى جاقسى كورەمىن. ءبىراق بۇگىنگى وقيعالاردىڭ بارىنە سالقىنقاندى قاراپ، الداعى جارىس كۇنىن ويلاۋ كەرەك. ەركىن باعدارلاماعا دايىندالۋعا ءتيىستىمىن. ەڭ باستىسى - جيناقى ءارى سابىرلى قالپىمدى ساقتاۋ. بۇل مەدال بارىنەن بۇرىن سەنىمدىلىك سىيلادى. ۇلكەن ناتيجە كورسەتە الاتىنىما سەنەمىن. ءتورت اينالىم سەكىرۋ ەلەمەنتى دە جارىس وتكەن سايىن جاقسارىپ كەلەدى. بۇرىنعىعا قاراعاندا تۇراقتالىپ قالدى. تورتتىك سالحوۆتى رەسمي جاتتىعۋ كەزەڭدەرىنىڭ بارلىعىندا ورىنداپ ءجۇرمىن»، - دەدى تۇرسىنبايەۆا.

ايتا كەتەيىك، ەليزابەت تۇرسىنبايەۆا الەم چەمپيوناتتارىندا مۇنداي ناتيجەگە العاش رەت قول جەتكىزىپ وتىر. قىسقا باعدارلاما قورىتىندىسى بويىنشا ول جاپونيالىق كاوري ساكاموتو (76.86) مەن رەسەيلىك الينا زاگيتوۆاعا (82.08) عانا جول بەرىپ تۇر. ءبىزدىڭ سپورتشى 75.96 ۇپاي جيناپ، ماۋسىمداعى ەڭ ۇزدىك كورسەتكىشىنە قول جەتكىزدى.

بۇعان دەيىن قازاقستاندىق مانەرلەپ سىرعاناۋشى ە. تۇرسىنبايەۆا قاتىسىپ جاتقان الەم چەمپيوناتىنىڭ جارىس كەستەسىن جازعان بولاتىنبىز.